පාස්කු ඉරුදින ත්‍රස්ත ප්‍රහාර මාලාවේ ප්‍රධාන සැකකරු අත්අඩංගුවට නොගත් බවට චෝදනා කරමින් ලැබුණු පැමිණිල්ලක් මත පදනම්ව සිදු කරන විමර්ශනවලට අදාළව අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂ ශානි අබේසේකර සහ හිටපු ජ්‍යෙෂ්ඨ නියෝජ්‍ය පොලිස්පති රවි සෙනෙවිරත්න යන මහත්වරුන් අත්අඩංගුවට ගැනීමේ සූදානමක් මේ වන විට නැතැයි නීතිපතිවරයා ඊයේ (20) ශ්‍රේෂ්ඨාධිකරණයට දන්වා සිටියේය.
තමන් අත්අඩංගුවට ගැනීමේ සූදානමක් ඇති බැවින් එය වළක්වන අතුරු තහනම් නියෝගයක් නිකුත් කරන ලෙස ඉල්ලා අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂවරුන් වන ශානි අබේසේකර සහ රවි සෙනෙවිරත්න යන මහත්වරු ගොනු කළ මූලික අයිතිවාසිකම් පෙත්සමක් කැඳවූ අවස්ථාවේදී නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් සුදර්ශන ද සිල්වා මහතා මේ බව දන්වා සිටියේය.
ප්‍රීති පද්මන් සූරසේන, අචල වෙන්ගප්පුලි සහ මහින්ද සමයවර්ධන යන ශ්‍රේෂ්ඨාධිකරණ විනිසුරු මඬුල්ලක් හමුවේ මෙම පෙත්සම් කැඳවනු ලැබිණි. එහිදී නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල්වරයා දන්වා සිටියේ පාස්කු ඉරුදින බෝම්බ පිපිරීමේ සිද්ධිය සම්බන්ධයෙන් සිදු කරන විමර්ශනවලට අදාළව ලැබුණු පැමිණිලි දෙකක් සම්බන්ධයෙන් වන විමර්ශන කටයුතු වලට අදාළව අපරාධ පරීක්ෂණ දෙපාර්තමේන්තුව නීතිපතිවරයාගෙන් උපදෙස් ඉල්ලා ඇති බවය.
අදාළ විමර්ශන කටයුතු මූලික අවධියේ පවතින අතර මේ අවස්ථාව වන විට එම සිද්ධිය සම්බන්ධයෙන් කිසිවෙකුත් අත්අඩංගුවට ගැනීමට තීරණය කර නැතැයි නියෝජ්‍ය සොලිසිටර් ජනරාල්වරයා සඳහන් කළේය. යම් හෙයකින් පෙත්සම්කරුවන් අත්අඩංගුවට ගැනීම සඳහා ප්‍රමාණවත් කරුණු විමර්ශනවලදී අනාවරණය වුවහොත් ඒ පිළිබඳව මෝසමක් මඟින් අධිකරණයට දැනුම් දෙන බව ඒ මහතා සඳහන් කළේය. කරුණු සලකා බැලීමෙන් අනතුරුව පෙත්සම වෙනත් දිනයක කැඳවීමට විනිසුරු මඬුල්ල තීරණය කළේය.
නීතිඥ මංජුල බාලසූරිය මහතා මඟින් ගොනු කර ඇති පෙත්සමෙහි වගඋත්තරකරුවන් ලෙස හේෂාන් පෙරේරා, ආරක්ෂක අමාත්‍යාංශ ලේකම්වරයා, පොලිස්පතිවරයා ඇතුළු පිරිසක් නම් කරනු ලැබ සිටියහ. තමන් මෙරට පොලිසියේ සේවය කළ ජ්‍යෙෂ්ඨ නිලධාරීන් වන බව පෙත්සම්කරුවන් කියයි. ජාතික ජන බලවේගයේ රැස්වීමක් පසුගිය ජූලි 6 වැනි දින මහරගම ජාතික තරුණ සේවා සභාවේ පැවැත්වූ අතර 25000කට අධික පිරිසක් විශ්‍රාමික පොලිස් නිලධාරීන් සහභාගිවූ බවද ඊට තමන් ද සහභාගිවූ බව පෙත්සමෙහි සඳහන් වේ. විශ්‍රාමික නියෝජ්‍ය පොලිස්පතිවරයකු වන පාලිත සිරිවර්ධන තමන්ට එරෙහිව අපරාධ පරීක්ෂණ දෙපාර්තමේන්තුවට පැමිණිල්ලක් කර ඇති අතර සේනක කුමාරසිංහ ඒ සම්බන්ධයෙන් ප්‍රවෘත්ති සාකච්ඡාවක් පවත්වා ඇති බව පෙත්සම්කරුවෝ සඳහන් කරති.
පාස්කු ත්‍රස්ත ප්‍රහාරයේ ප්‍රධාන සැකකරු අත්අඩංගුවට ගැනීමට පෙත්සම්කරුවන් අසමත්වූ බවට ඔවුන් එහිදී ප්‍රබල ලෙස චෝදනා එල්ල කළ බවද පෙත්සමෙහි සඳහන් වේ. එම පැමිණිල්ල හුදෙක්ම දේශපාලන අරමුණු මත සිදු කරන ලද පැමිණිල්ලක් බවට පෙත්සම්කරුවෝ චෝදනා කර සිටිති. මෙම පැමිණිල්ලට අදාළව තමන් කොයි මොහොතේ හෝ අත්අඩංගුවට ගැනීමේ සූදානමක් සහ ත්‍රස්තවාදය වැළැක්වීමේ පනත යටතේ රඳවා ගැනීමේ අවදානමක් ඇති බව පෙත්සම්කරුවෝ සඳහන් කරති. එවැන්නක් සිදු වුවහොත් එමඟින් සිය මූලික අයිතිවාසිකම් උල්ලංඝනය වීමේ ආසන්න අවදානමක් ඇති බවට පෙත්සම් කරුවෝ පෙන්වා දෙති.
එබැවින් එම පැමිණිල්ලට අදාළව තමන් අත්අඩංගුවට ගැනීම වළකාලමින් අතුරු නියෝගක් නිකුත් කරන ලෙසද පෙත්සම්කරුවෝ සිය පෙත්සමෙන් ඉල්ලා සිටිති. එලෙස අත්අඩංගුවට ගැනීමක් සිදුවුවහොත් එමඟින් සිය මූලික අයිතිවාසිකම් උල්ලංඝනය වන බවට තීන්දු කරන ලෙස පෙත්සම මඟින් ඉල්ලා ඇත.
එලෙස අත්අඩංගුවට ගැනීමක් කර රඳවා ගැනීමක් කළහොත් වහාම තමන් මුදාහරින ලෙස පෙත්සම්කරුවෝ අධිකරණයෙන් ඉල්ලා සිටිති. එසේම රුපියල් මිලියන සියයක වන්දි මුදල් අයකර දෙන ලෙස ද පෙත්සම මඟින් ඉල්ලා ඇත. ජනාධිපති නීතීඥ උපුල් කුමාරප්පෙරුම මහතා පෙත්සම්කරුවන් වෙනුවෙන් පෙනී සිටියේය.
