ඔන්මැක්ස් ඩීටී මහා පරිමාණ පිරමීඩ වංචාවේ ප්රධාන පෙළේ නියෝජිතයකු බව කියන අයකුට පහරදී මහ මඟ දමා ගිය ඇඹිලිපිටියේ උපකාරක පන්ති ගුරුවරයකුගේ බිරියක් අත්අඩංගුවට ගෙන තිබේ.
රන්න, තලුන්න ප්‍රදේශයේ පදිංචි සංචාරක මඟ පෙන්වන්නකු ඇඹිලිපිටිය ප්‍රදේශයේ පදිංචි පුද්ගලයකු පැහැරගෙන ගොස් පහර දී වෙල් යායකට ගෙනවිත් දමා තිබිය දී ප්‍රදේශවාසීන් එක්ව තංගල්ල මූලික රෝහලට ඊයේ (27) ඇතුළත් කර ඇතැයි හුංගම පොලිසිය කියයි.
මෙලෙස පැහැර ගැනීමට ලක්ව ඇත්තේ ඔන්මැක්ස් ඩීටී මහා පරිමාණ පිරමීඩ වංචාවේ ප්රධාන පෙළේ නියෝජිතයකු බව ද පොලිසිය කියයි.
මේ සිද්ධිය සම්බන්ධයෙන් උපකාරක පංති ගුරුවරයකුගේ බිරිය අත්අඩංගුවට ගත් බව ද පොලිසිය සඳහන් කරයි. මෙලෙස පැහැර ගැනීමට ලක්ව ඇත්තේ ‘සිසිලස’, තලුන්න, රන්න ලිපිනයේ පදිංචි සංචාරක මඟ පෙන්වන්නකු ලෙස කටයුතු කළ 35 හැවිරිදි චන්ද්‍ර බණ්ඩාරගේ හෂේන් මදුෂංක නමැත්තාය.
පැහැර ගැනීමට ලක් වූ පුද්ගලයාගේ බිරිය වන 33 හැවිරිදි මනම්පේරි මුදලිගේ ගීතානි ඉරේෂා නමැති අය විසින් 26 වැනි දින හුංගම පොලිසියට මෙම පැමිණිල්ල ඉදිරිපත් කර තිබේ.
සිය සැමියා එම ප්‍රදේශයේම පදිංචි සිය ඥාතියකු සමඟ මත්පැන් පානය කර එම නිවසේ තිබූ මෝටර් රථයක නිදාගෙන සිටියදී කොළ පැහැති කාර් රථයකින් පැමිණි තිදෙනකු පැහැරගෙන ඇති බව පැමිණිලිකාරිය සිය පැමිණිල්ලෙන් දක්වා ඇතැයි පොලිසිය කියයි.
සිය සැමියා ඇඹිලිපිටිය ප්‍රදේශයේ පදිංචි උපකාරක පන්ති ගුරුවරයකු සමඟ මුදල් ගනුදෙනුවක් සම්බන්ධ ආරවුලක් තිබූ අතර, නිතර නිතර එම ගුරුවරයා දුරකතනයෙන් කතා කර තර්ජනය කරන බවත් ඔහු සිය සැමියා පැහැර ගන්නට ඇතැයි සැක කරන බවත් පැමිණිලිකාරිය පැමිණිල්ලෙන් දක්වා තිබූ බව ද පොලිසිය සඳහන් කරයි.
ඒ අනුව සිද්ධියට සම්බන්ධ බව කියන ඇඹිලිපිටිය පදිංචි උපකාරක පන්ති ගුරුවරයකු හා ඔහුගේ බිරිය සොයා පොලිසිය විමර්ශන ආරම්භ කළ අතර, එහිදී උපකාරක පන්ති ගුරුවරයා පොලිසිය මඟහැර ඇති අතර, ඔහුගේ බිරිය අත්අඩංගුවට පත්ව තිබේ. පැහැර ගැනීමට ලක් වූ පුද්ගලයා පසුගිය කාලයේ ‘ඔන්මැක්ස් ඩීටී’ නමින් පවත්වන ලද මූල්‍ය ව්‍යාපාරයේ රන්න ප්‍රදේශයේ ප්රධාන පෙළේ නියෝජිතයකු ලෙස කටයුතු කර ඇති බවත් මෙම උපකාරක පන්ති ගුරුවරයා ද මේ සඳහා මුදල් යොදවා ඇති බවත් මූලික පොලිස් විමර්ශනවලදී අනාවරණය වී තිබේ.
පැහැර ගැනීමට ලක් වූ පුද්ගලයාට පහර දී අතරගම වෙල් යායකට ගෙනත් දමා තිබිය දී ප්‍රදේශවාසින් රෝහල්ගත කර තිබේ. අත්අඩංගුවට පත් සැකකාරිය අගුණුකොළපැලැස්ස මහේස්ත්‍රාත් අධිකරණයට ඉදිරිපත් කිරීමට නියමිතය. තංගල්ල කොට්ඨාස භාර ජ්‍යෙෂ්ඨ පොලිස් අධිකාරි සිසිර පෙත්තතන්ත්‍රි මහතාගේ උපදෙස් පරිදි හුංගම පොලිස් ස්ථානාධිපති ප්රධාන පොලිස් පරීක්ෂක ක්‍රිෂාන්ත සම්පත් ජයසිංහ මහතා ඇතුළු නිලධාරින් කණ්ඩායමක් විමර්ශන පවත්වති.
