ඉදිරි මහ මැතිවරණයට ප්‍රබල ලෙස සන්ධානගතවී සර්වජන බලය යටතේ තරග කරන බවත් ඒ සඳහා තරුව හැර වෙනත් සලකුණකින් තරග කරන බවත් මව්බිම ජනතා පක්ෂයේ නායක ව්‍යවසායක දිලිත් ජයවීර පැවසීය. පක්ෂයේ ජාතික සංවිධායක ලෙස හිටපු රාජ්‍ය ඇමැති දිලුම් අමුණුගම පත් කිරීමෙන් අනතුරුව බොරැල්ල සිය පක්ෂ කාර්යාලයේදී පෙරේදා (26) පැවති මාධ්‍ය හමුවේදී හෙතෙම මේ බව සඳහන් කළේය.
ඒ මහතා වැඩිදුරටත් මෙසේ ද පැවැසීය.
ජ්‍යෙෂ්ඨ නායක හේමකුමාර නානායක්කාර මහතා තාරුණ්‍යයට දන් දුන් පක්ෂයක් තමයි මව්බිම ජනතා පක්ෂය කියන්නේ. අපි ජනාධිපතිවරණයේදී අලුත්ම දේශපාලන කණ්ඩායමක් හැටියට, මම මීට පෙර දේශපාලනය නොකළ පුද්ගලයෙක් හැටියට ජනතාව ඉදිරියට ගොස් ඔවුන්ගෙන් සැලකිය යුතු ප්‍රතිඵලයක් ලබා ගත්තා. කොහොම වුණත් අපි දැන් පාර්ලිමේන්තු මැතිවරණයට මුහුණදීමට යුහුසුළුව කටයුතු කරනවා. අපි මැතිවරණ දිස්ත්‍රික්ක 22 සඳහාම පාර්ලිමේන්තුවට ඉදිරිපත් කරනවා. අපි ලංකාවේ වඩාත් බලපෑමක් කළ හැකි දේශපාලන සන්ධානය මෙවර බිහිකරනවා. අපි ආරාධනා කර තිබෙනවා අපි කියන නිර්ණායක යටතේ එකතු වෙන්න කියලා. ප්‍රධාන ධාරාවේ දේශපාලනයේ යෙදෙන දේශපාලකයන්ට අප සමඟ සංවාදයකට එන්න. අපට අවශ්‍ය ජනතාව අපේක්ෂා කරන ඒ වෙනස නිර්මාණය කර ගැනීමට. ඒ නිසා වෙනස්වූ දේශපාලනයකට කැමති සියලු දෙනාට අප සමඟ එකතු වෙන්න පුළුවන්. දිලුම් අමුණුගම හිටියේ අපට ඡන්දය නොදුන් පාර්ශ්වයේ. එතකොට දිලුම් අමුණුගම ගත් තීරණය මහ මැතිවරණයේදී ජනතාව ගනීවි. දැන් සරත් අමුණුගම මහතා මේ පිළිබඳව ධනාත්මකව බලයි කියා අපි විශ්වාස කරනවා. අපි අපේ පක්ෂයට එකතු කර ගන්නේ අපේ නිර්ණායකයන්ට යටත් වෙනවා නම් පමණයි. එහෙම නැතිව අංකය වැඩි කර ගැනීමට එකතු කර ගැනීමට කිසිම බලාපොරොත්තුවක් නැහැ. ජනතාව ජනතා විමුක්ති පෙරමුණ විශ්වාස කර අපි අවිශ්වාස කළා ද නැද්ද කියන එක තීරණය වෙයි මේ මහ මැතිවරණයෙන් පස්සේ.අපි දිගටම ඉන්නේ උපායමාර්ගික වැඩපිළිවෙළේමයි.Ó
මව්බිම ජනතා පක්ෂයේ ජාතික සංවිධායක හිටපු රාජ්‍ය ඇමැති දිලුම් අමුණුගම –
අපි ගෝඨාභය රාජපක්ෂ සමඟ තමයි වගකීම් භාර ගත්තේ. අවසන් කරන්න වුණේ රනිල් වික්‍රමසිංහ සමඟ. එතුමාට අපි කළ යුතු යුතුකමක් හැටියට මැතිවරණයේදීත් අපි එතුමාගේ ජයග්‍රහණය පිණිස කැපවෙලා කටයුතු කළා. හැබැයි දැන් අපට නිදහස ලැබී තිබෙනවා අපි දේශපාලනය කළ යුත්තේ කා සමඟද කියා තීන්දු කරන්න. මම ජාතික සංවිධායක තනතුර භාර ගත්තේ මේ පක්ෂය ලංකාවේ වඩාත්ම ශක්තිමත් කිරීමේ අරමුණින්. මොකද මේ පක්ෂයේ නායක දිලිත් ජයවීරගේ ප්‍රතිපත්ති ඉතාම හොඳයි. ශ්‍රී ලංකා පොදුජන පෙරමුණ ආරම්භ කළෙත් අපි ඒ සඳහා මූලික වුණෙත් අපි. හැබැයි එම රජයෙන් තරුණයන්ගේ බලාපොරොත්තු ඉටු නොවුණ නිසා මම විශ්වාස කරනවා මේ පක්ෂයේ ප්‍රතිපත්ති මාලාව ඇතුළත ඒවා ඉටු කරන්න පුළුවන් වෙයි කියලා. මේ මැතිවරණ ප්‍රතිඵලය දෙස බැලුවාමත් අපට පැහැදිලි වෙනවා සාම්ප්‍රදායික දේශපාලනයට තිබෙන තැන කොහෙද කියලා. ඒ නිසා සාම්ප්‍රදායික දේශපාලනයෙන් එහාට ගිහින් විශේෂයෙන්ම තමන්ගේ යහපත පිණිස දේශපාලනය කරනවාට වඩා සමාජයේ යහපත පිණිස දේශපාලනය කරන කණ්ඩායමක් රැඳී සිටින මව්බිම ජනතා පක්ෂයේ නායක දිලිත් ජයවීර සමඟ වැඩ කරන්න භාර ගත්තේ ඉතා සතුටින්. අපි භාර ගන්න ඕනෑම කටයුත්තක් පරාජය වෙලා අතහරින්නේ නැහැ. ඒ නිසා අනිවාර්යයෙන්ම මේ පක්ෂයේ ජයග්‍රහණය කරා යෑමට කැපවෙනවා.
තව වසර 5ක් 10ක් ඉදිරිය බැලුවොත් මේ රටේ නායකයන් නැහැ. නායකයන් කියාගන්න පිරිස් නෑ. නමුත් ප්‍රායෝගිකව දෙයක් කළ හැකි නායකයන් නැහැ. ඒ නිසා ගෝඨාභය රාජපක්ෂ ගැන විශ්වාසය තබා එතුමා නිර්මාණය කරන්න වෙර දැරුවා වගේම අර්බුදකාරී තත්ත්වයේදී රනිල් වික්‍රමසිංහට අත දුන්නා වගේම ඉදිරියේදී රටට නායකයන් නැත්තම් නායකයෙක් බිහි කිරීමට අපි කැපවීමෙන් කටයුතු කරනවා.
මම ලේසි තැනින් අමාරු තැනට ඇවිත් ඉන්නේ. මොකද මම කලින් හිටපු තැන හිටියා නම් පහසුවෙන් පාර්ලිමේන්තුවට යන්න පුළුවන්.Ó
