යුද හමුදා අන්තර් රෙජිමේන්තු ජූඩෝ තරගාවලියේ විවෘත අංශයේ පිරිමි ශූරතාව දිනා ගැනීමට ගජබා රෙජිමේන්තුව සමත් වූ අතර, එහි කාන්තා ශූරතාව යුද හමුදා කාන්තා බළකායට හිමි විය.
විවෘත අංශයේ පිරිමි හා කාන්තා අනුශූරතා පිළිවෙළින් ශ්‍රී ලංකා යුද හමුදා යුධෝපකරණ බළකා කාණ්ඩායමට සහ ඉංජිනේරු බළකා කාණ්ඩායමට හිමි විය.
පසුගියදා පනාගොඩ යුද හමුදා ගෘහස්ථ ක්‍රීඩාගාරයේදී ක්‍රීඩක ක්‍රීඩිකාවන් 188 දෙනෙකුගේ සහභාගිත්වයෙන් ආධුනික හා විවෘත ලෙස කාණ්ඩ 2ක් යටතේ තරගාවලිය පැවති අතර, ආධුනික අංශයේ ශූරතාව සිංහ රෙජිමේන්තුව සතු විය.
තරගාවලියේ දක්‍ෂතම ක්‍රීඩකයා ලෙස යුධෝපකරණ බළකායේ කෝප්‍රල් ජී.ඒ.එම්. චින්තක සහ දක්‍ෂතම ක්‍රීඩිකාව ලෙස කාන්තා බළකායේ කෝප්‍රල් ඩබ්ලිව්.එල්.ඒ.එච් ඉමේෂා සම්මාන හිමි කර ගත්හ.
තරගාවලියේ ජය සංකේත ප්‍රදානය ප්‍රධාන ආරාධිතයා ලෙස යුද හමුදා මාණ්ඩලික ප්‍රධාන හා යුද හමුදා ජූඩෝ කමිටු සභාපති මේජර් ජෙනරාල් දිනේශ් නානායක්කාර මහතාගේ ප්‍රධානත්වයෙන් සිදු කෙරිණි.
