මට පීනන්න පුළුවන් නිසා මම ට්‍රැක්ටරය නතර කරලා වතුරට පැන්නා. එතකොටම නැතිවුණ කෙනා මගෙ අතට අහුවුණා. – රියැදුරු හසිත
“වසන්ත පාපැදිය නතර කර ඉදිරියට යන්න සූදානම් වන විට මම එයාට කිව්වා, ඔයා අරක්කු බීලා නිසා යන්න එපා කියලා. ඒත් වසන්ත ඒක අහන්නේ නැතුව පාරේ ඉස්සරහට ගියා. මම මඟ නතරවෙලා හිටියා. වසන්ත මීටර් පනහක් හැත්තෑ පහක් විතර ගියා. මම දැක්කා, එයා සැඩ පහරේ ගසාගෙන යනවා.” යැයි සැඩ පහරට හසුව මිය ගිය පුද්ගලයකුගේ මරණ පරීක්ෂණයේදී ශිරාන් චන්ද්‍ර බණ්ඩාර 42 නමැති අය සාක්ෂි දෙමින් පැවැසුවේය.
මෙසේ මිය ගොස් ඇත්තේ වැලිකඩගේ වසන්ත කුමාර නමැති 48 හැවිරිදි දෙදරු පියෙකි. ඔහු තුත්තිරිපිටිය, හල්තොට ලිපිනයේ පදිංචි කුලී රැකියාවල නියුතු අයෙකි.
හොරණ දිස්ත්‍රික් මහ රෝහලේ හදිසි මරණ පරීක්ෂණ උසාවියේදී පැවති මේ මරණ පරීක්ෂණයේදී මිල්ලනිය පොලිසියේ පොලිස් සැරයන් 33781 සොයිසා නිලධාරියාගේ සාක්ෂි විමසීම මත තවදුරටත් සාක්ෂිකරු මෙසේ ද පැවැසීය.
“මම 302 ඒ, මහවත්ත, කෙලෙස්ගමුව, හල්තොට පදිංචි වෙලා ඉන්නේ. මම රියැදුරු රස්සාව කරන්නේ. සිද්ධිය වූ දිනයේ මම ගෙදර හිටියා. පසුගිය දින දෙක පුරා තිබුණ අධික වැස්ස නිසා අඟුරුවාතොට මාර්ගයේ හල්තොට වෙල්යාය සම්පූර්ණයෙන් වතුරෙන් යටවෙලා තිබුණා. හවස දෙක හමාරට විතර මට බිරිය කතා කර ගංවතුර බලන්න යමු කිව්වා. පස්සෙ මමයි, බිරියයි වෙල්යායට ගංවතුර බලන්න ගියා. එතකොට මම දැක්කා, ප්‍රධාන මාර්ගය අඩි දෙකක් විතර උඩින් යටවී තිබුණා. මම ගංවතුර පටන් ගන්න තැන නැවතී ඉන්න කොට මේ නැතිවෙලා ඉන්න වසන්ත පාපැදියකින් එතැනට ආවා. මම එයා අඳුනනවා. වසන්ත මගේ කරට අත දමාගෙන මාව ඉම්බා. එතකොට එයාගේ කටින් අරක්කු ගඳක් ආවා. වසන්ත පාපැදිය නතර කර ඉස්සරහට යන්න සූදානම් වූණා. එතකොට මම එයාට කිව්වා, ඔයා අරක්කු බීලා ඉන්න නිසා යන්න එපා කියලා. ඒත් එයා ඒක අහන්නේ නැතුව පාරේ ඉස්සරහට ගියා. මම මඟ නතරවෙලා හිටියා. එයා මීටර් පනහක් හැත්තෑ පහක් විතර ගිය විතරයි, මම දැක්කා එයා සැඩ පහරේ ගහගෙන යනවා. මම අවට අයට කෑගහමින් ඉස්සරහට ගියා. ඒත් මට පිහිනීමට බැරි නිසා මම වෙලට බැස්සේ නෑ. මම දැක්කා, වැලිකඩ වතුරේ ගසාගෙන යනවා. පස්සෙ ඔහු නොපෙනී ගියා. පස්සෙ ට්‍රැක්ටරයකින් ආව හසිත වතුරේ ගිහින් කිමිදිලා වසන්ත ගොඩට ගෙනැවිත් හල්තොට ඉස්පිරිතලෙට ට්‍රැක්ටරයේම අරන් ගියා. පස්සෙ දැනගත්තා වසන්ත නැතිවෙලා කියලා.”
මෙහිදී සාක්ෂි දුන් හල්තොට කෙලෙස්ගමුවේ පදිංචි රියැදුරකු වන සුවන්දරගේ හසිත ධර්මවර්ධන මහතා
“මේ අනතුර වූ දවසේත් ඊට පෙර දවසේත් අධික වැස්ස නිසා හල්තොට ඔකන්දුව වෙල්යායත්, අඟුරුවාතොට රයිගම මාර්ගයත් සම්පූර්ණයෙන්ම ජලයෙන් යටවෙලා තිබුණා. ගංවතුර බලන්න මගේ ට්‍රැක්ටරයකින් වෙල්යායට ගියා. එහෙම එනකොට මම දැක්කා, එම ප්‍රදේශය සම්පූර්ණයෙන් ජලයෙන් යටවී තියෙනවා. මම ට්‍රැක්ටරයෙන් ටික දුරක් යන කොට එක තැනක සෙනඟ පිරිලා ඉන්නවා දැක්කා. මම ඇහුවා, මොකද කියලා. එයාලා කිව්වා, මේ දැන් කෙනෙක් ගංවතුරේ ගහගෙන ගියා කියලා. මට පීනන්න පුළුවන් නිසා මම ට්‍රැක්ටරය නතර කරලා වතුරට පැන්නා. වතුරට පැන්න මම නැතිවුණ කෙනා හෙව්වා. එතකොට මට නැතිවුණ කෙනා අතට අහුවුණා. පස්සෙ මම ඔහු ගොඩට ගෙනාවා. ගෙනැවිත් ඉක්මනින්ම ට්‍රැක්ටරයේ දාගෙන හල්තොට ඉස්පිරිතාලෙට අරන් ආවා. එහිදී වෛද්‍යවරුන් පරීක්ෂා කර බලා කිව්වා, නැතිවෙලා කියලා.”
හොරණ දිස්ත්‍රික් මහ රෝහලේ සහකාර අධිකරණ වෛද්‍ය නිලධාරී සංජය ගුණසේකර මහතා විසින් පශ්චාත් මරණ පරීක්‍ෂණය සිදු කළේය.
මෙහිදී ඉදිරිපත් වූ සාක්ෂි සහ වෛද්‍ය වාර්තා අනුව මේ මරණය ගංවතුරින් යට වූ මාර්ගයක ගමන් කිරීමේදී සැඩ පහරට හසුවී දියේ ගිලී හුස්ම ගැනීමට සිදු වූ අපහසුතාව මත සිදු වූ මරණයක් බවට මිල්ලනිය හදිසි මරණ පරීක්ෂක, සාම විනිසුරු දීපාල් ඖෂධරත්න මහතා නිගමනය කළේය.
හල්තොට සමූහ
විනීතා මානෙල් ගමගේ
