සමාජ මාධ්‍ය ඔස්සේ පළ කරනු ලබන රැකියා ඇබෑර්තු සඳහා මාර්ගගත ක්‍රමයට ඉල්ලුම් කරන පිරිස් අන්තර්ජාල සයිබර් අපරාධකරුවන්ගේ නවතම ඉලක්කය බවට පත් වී ඇතැයි ශ්‍රී ලංකා පරිගණක හදිසි ප්‍රතිචාර සංසදය පවසයි.
විවිධ ව්‍යාජ රැකියා ඇබෑර්තු පිළිබඳ තොරතුරු සඳහන් දැන්වීම් කිහිපයක්ම මේ වන විට සමාජ මාධ්‍ය අවකාශයන්හි හුවමාරු වන බවට නිරීක්ෂණය වී ඇති බව එම සංසදයේ ජ්‍යෙෂ්ඨ ඉංජිනේරුවරයකු ‘දිනමිණට’ ඊයේ (16) පැවසුවේය.
ඒ නිසා කිසිදු ලෙසකින් හෝ එවැනි ව්‍යාජ රැකියා ඇබෑර්තු පිළිබඳ තොරතුරු සඳහන් වන සමාජ මාධ්‍ය දැන්වීම් වෙත ප්‍රතිචාර දැක්වීමෙන් වළකින ලෙසත් සෑම අවස්ථාවකදීම අදාළ ආයතනයන්හි නිවැරැදිම වෙබ් අඩවිය හඳුනාගෙන එහි සඳහන් උපදෙස් අනුව පමණක් එම රැකියා සඳහා ඉල්ලුම් කිරීම කළ යුතු බවත් ඒ මහතා වැඩිදුරටත් සඳහන් කළේය.
එමෙන්ම සමාජ මාධ්‍ය දැන්වීම් පරිශීලනයේදී නොදන්නා පාර්ශ්ව වෙත තම බැංකු ගිණුම් විස්තර ලබා නොදිය යුතු බවත් OTP අංක හුවමාරු කර ගැනීමෙන් වළකින ලෙසත් ඉල්ලා සිටියේය.
