අලවතුගොඩ පොලිස් වසමේ බුළුගොහුතැන්න ප්‍රදේශයේ නිවෙසක මෙහෙකාරකමට ආ කාන්තාවක් එම නිවෙසේ හිමිකාරිය සතුව තිබුණු ලක්ෂ හතරහමාරක් පමණ වටිනා අත් පලඳනාවක් හා රන් මාලයක් සොරාගෙන ගොස් තිබේ.
නිවෙසේ අල්මාරියක තබා තිබුණු මෙම රන් භාණ්ඩ කිසිවකු විසින් සොරාගෙන ගොස් ඇති බව දැනගත් නිවෙස් හිමිකාරිය එම රන් භාණ්ඩ මෙහෙකාරිය විසින් සොරා ගත්තා දැයි විමසනු ලැබ ඇති අතර, එම අවස්ථාවේ ඇය පවසා ඇත්තේ තමන් එම භාණ්ඩ සොරා නොගත් බවයි. පසුව මේ පිළිබඳව නිවෙසේ හිමිකාරිය අලවතුගොඩ පොලිසියට පැමිණිලි කර තිබේ. එම පැමිණිල්ලට අනුව විමර්ශන ආරම්භ කළ පොලිස් නිලධාරින් රන් භාණ්ඩ අස්ථානගත වූ නිවෙසේ සිටි මෙහෙකාරියගෙන් ප්‍රශ්න කර ඇති අතර, ඒ අවස්ථාවේ ද ඇය රන් භාණ්ඩ සොරා ගත්තේ නැති බව පොලිසියට පවසා තිබේ. ඉන් නොනැවතුණු පොලිස් නිලධාරින් කාන්තාව ගැන විමසිල්ලෙන් සිටිද්දී ඇය දිගන ප්‍රදේශයට ගොස් ඇති බවට තොරතුරක් ලැබී තිබිණ. ඇය දිගනට ගියේ ඇයි දැයි පොලිස් නිලධාරින් ප්‍රශ්න කරන විට ඇය පවසා ඇත්තේ, සරස්වතී පිළිමයක් රැගෙන ඒමට දිගනට ගිය බවයි. පසුව පොලිස් නිලධාරින් පිරිසක් දිගනට ගොස් ඇය සරස්වතී පිළිමය මිලදී ගත් බව පැවසෙන වෙළෙඳසලට ගොස් පසුව එය ආසන්නයේ පිහිටි රන් භාණ්ඩ අලෙවිසල් පරික්ෂාවට ලක් කර තිබේ. එසේ පරීක්ෂා කිරීමේදී සැකකාර කාන්තාව විසින් ඇය සේවය කළ නිවෙසින් සොරා ගත් බව පැවසෙන රන් මාලය හා අත් පලඳනාව රන් භාණ්ඩ අලෙවිසලකට විකුණා ඇති බව අනාවරණය කර ගත හැකි විය. සොරා ගන්නා ලද රන් භාණ්ඩ විකුණා එම මුදලින් සැකකාරිය එම අලෙවිසලෙන්ම රන් මාලයක් හා කරාබු ජෝඩුවක් මිලදීගෙන ඇති අතර, රන් භාණ්ඩ අලෙවිසලේ හිමිකරු පොලිස් නිලධාරින්ට පවසා ඇත්තේ එම රන් භාණ්ඩවලට අමතරව විකිණූ රන් භාණ්ඩවල ඉතිරි වටිනාකම වන රුපියල් අනූහය දහසක මුදලක් ද ඇයට ලබා දුන් බවයි.
අනතුරුව සැකකාර කාන්තාව අත්අඩංගුවට ගත් පොලිස් නිලධාරින් ඇයගෙන් දිගින් දිගටම ප්‍රශ්න කිරීමේදී අනාවරණය කරගෙන ඇත්තේ ඇය මිලදී ගත් රන් භාණ්ඩ උඩුදුම්බර වෙසෙන ඇගේ ඥාතියකු දිගනට ගෙන්වාගෙන ඔහුට ලබා දී ඇති බවයි. පසුව උඩුදුම්බර ප්‍රදේශයට ගිය පොලිස් නිලධාරින් ඇය ඥාතියකුට ලබා දී තිබුණු රන් භාණ්ඩ ද පොලිස් භාරයට ගෙන තිබේ. රංගල ප්‍රදේශයේ ස්ථිර පදිංචිකාරිනියක වන 38 හැවිරිදි සැකකාරිය මහනුවර මහේස්ත්‍රාත් අධිකරණය වෙත ඉදිරිපත් කිරීමෙන් පසු ඊයේ (16) දක්වා රක්ෂිත බන්ධනාගාරගත කර තිබේ.
