කටාන ප්‍රාදේශීය සභා බලප්‍රදේශයේ අතුරු මාර්ගවල මෙන්ම ප්‍රධාන මාර්ගවල දිවා කාලයේ දැල්වෙන වීදි ලාම්පු නිසා අතිවිශාල විදුලිය නාස්තියක් සිදුවන බව ජනතාව පවසති.
මේ පිළිබඳව කටාන ප්‍රදේශීය සභාවෙන් සිදු කළ විමසීමේදී ලද තොරතුරු අනුව වීදි ලාම්පු සවි කිරීමට අදාළව චක්‍රලේඛ හෝ විධිමත් ක්‍රමවේදයක් නොමැති අතර, පුද්ගල අවශ්‍යතා අනුව වීදි ලාම්පු සවි කිරීම සිදු කර ඇත.
විදි ලාම්පු දැල්වීමට සහ නිවා දැමීම සඳහා විධිමත් වැඩපිළිවෙළක් නොමැති අතර වීදි ලාම්පු දෙකක් අතර සම්මත දුරක් ද නොමැත.
එක් කිලෝමීටරයක් තුළ වීදි පහන් 30කට අධික ප්‍රමාණයක් සවි කර ඇති බවත් මෙම වීදි පහන්වලින් අඩුම තරමින් වීදි ලාම්පු 10ක් පමණ පස්වරු හයට පෙර දල්වා පෙරවරු දහය පසුවන තෙක් දැල්වී තිබෙන අතර, අවම වශයෙන් වීදි ලාම්පු හතරකට වැඩි ප්‍රමාණයක් පැය විසිහතර පුරාම දැල්වෙමින් තිබෙන බවද නිරීක්ෂණය විය. මේ අනුව එක් කිලෝමීටරයක එක් දිනක් තුළ දිවා කාලයේ දැල්වෙන වීදි පහන් සඳහා විදුලි ඒකක 10කට ආසන්න ප්‍රමාණයක් වැයවේ.
වීදි ලාම්පු සවි කිරීමේදී මාර්ගයට ආලෝකය වැටෙන ලෙස සවි නොකර ඒ අසල ඇති ව්‍යාපාරික ස්ථාන ගොඩනැඟිලි වැඩබිම්වලට ආලෝකය ලබාදීමේ අරමුණින් සවි කර ඇති බවද දක්නට ලැබේ.
අනවශ්‍ය ස්ථානවල සවි කර ඇති වීදි ලාම්පු ඉවත් කිරීමටත් වීදි ලාම්පු ස්වයංක්‍රියව දැල්වීමට සහ නිවා දැමීම සඳහා අවශ්‍ය උපකරණ සවි කර විදුලිය අපතේ යාම වළක්වා ගැනීමට කටයුතු කිරීම ප්‍රාදේශීය සභාවේ බලධාරින්ගේ වගකීමකි.
