නීති විරෝධී ලෙස මෙරටට දුම්වැටි රැගෙන විත් අලෙවි කිරීමේ ජාවාරමක් සම්බන්ධයෙන් පොලිස් විශේෂ කාර්ය බළකාය කළ වැටලීමකදී මගී බස් රථ හිමිකරුවකුගේ තලංගම පිහිටි නිවෙසක තිබී විවිධ පුද්ගලයන්ට අයත් හැඳුනුම්පත් සහ රියැදුරු බලපත්‍ර 29ක් හමුවී තිබේ.
ජාතක හැඳුනුම්පත් විසිදෙකක්, රියැදුරු බලපත්‍ර හයක් සහ පොලිස් සැරයන්වරයකුගේ පොලිස් හැඳුනුම්පතක් ඒ අතර තිබී ඇත.
මේ සම්බන්ධයෙන් කළ ප්‍රශ්න කිරීම්වලදී සහ විමර්ශනවලින් අනාවරණය වී ඇත්තේ බස් රථවල වැටී තිබී හමු වූ මුදල් පසුම්බිවල තිබුණු හැඳුනුම්පත් සහ රියැදුරු බලපත්‍ර ඔහු මෙසේ තමා ළඟ තබාගෙන සිට ඇති බවය. මුදල් සහ හැඳුනුම්පත් තබාගෙන මුදල් පසුම්බි විසි කර ඇති බවත් එම මුදල් පසුම්බි සහ හැඳුනුම්පත් හිමිකරුවන්ට ලබා නොදී ඔහු සිය සන්තකයේ තබාගෙන සිට ඇති බවත් විමර්ශනවලින් පෙනී ගොස් ඇත. මෙසේ ඔහු හැඳුනුම්පත් සහ රියැදුරු බලපත්‍ර රැස්කර ඇත්තේ නීති විරෝධී ක්‍රියාවක් සඳහා යොදා ගැනීමට දැයි සැකයක්ද පොලිස් විශේෂ කාර්ය බළකා නිලධාරින්ට ඇතිවී තිබේ.
පොලිස් විශේෂ කාර්ය බළකායේ බුද්ධි අංශ ස්ථානාධිපති ප්‍රධාන පොලිස් පරීක්ෂක නදීක සිල්වා මහතාගේ මෙහෙයවීමෙන් තලංගම කන්දවත්ත පාරේ පිහිටි මගී බස් රථ එකොළහක හිමිකරුවෙක් බව කියන පුද්ගලයෙකුගේ නිවෙසක් පෙරේදා වටලා ඇත්තේ එම නිවසේ නීති විරෝධී දුම්වැටි ඇති බවට ලද තොරතුරකට අනුවයි.
එහිදී නිවෙසේ ගරාජයක තිබී විවිධ වර්ගයේ දුම්වැටි හාරදාහක් පමණ සොයාගෙන තිබේ. අනතුරුව නිවෙස පරීක්ෂා කිරීමේදී හැඳුනුම්පත් සහ පොලිස් සැරයන්වරයාගේ නිල හැඳුනුම්පත හමුවී ඇත. මේ සම්බන්ධයෙන් වැඩිදුර විමර්ශනය සඳහා සැකකාර බස් රථ හිමිකරු තලංගම පොලිස් ස්ථානයට භාර දුන් බව පොලිස් විශේෂ කාර්ය බළකාය සඳහන් කළේය.
