ජනාධිපතිවරයා එක කණ්ඩායමකත් ආණ්ඩුව තව කණ්ඩායමකත් බලය ලැබීම තුළ කිසිවකුට හොරාකෑමට නොහැකි රාජ්‍ය පාලනයක් පවත්වාගෙන යෑමට හැකි බැවින් සමගි ජන බලවේගයට බලය ලබා දීමට කටයුතු කරන ලෙස ජනතාවගෙන් ඉල්ලා සිටින බව සමගි ජන බලවේගයේ අනුරාධපුරය දිස්ත්‍රික් පාර්ලිමේන්තු අපේක්ෂක රෝහණ බණ්ඩාර මහතා සඳහන් කළේය. රෝහණ බණ්ඩාර මහතා මේ බව කියා සිටියේ පෙරේදා (17) අනුරාධපුරයේදී පැවති මාධ්‍ය හමුවකදීය.
එහිදී තවදුරටත් අදහස් දක්වමින් මෙසේ ද පැවසීය.
වත්මන් ජනාධිපති අනුර කුමාර දිසානායක මහතාගේ පාලනය යටතේ රටේ ජනතාවගේ අපේක්ෂාවන් භංගත්වයට පත්ව තිබෙනවා. 76 වසරක සාපය නිමා කර නව වෙනසක් සමඟ ජනතාව ණය බරින් මුදාගන්නා බවට පෙනී සිටිමින් බලයට පැමිණි ජාතික ජන බලවේගය මඟින් ජනතාවගේ බලාපොරොත්තු ඉටුකරනු ඇති බවට කිසිදු විශ්වාසයක් නැහැ. වෙනසක් වෙනුවෙන් රටේ ජනතාව විසින් නව ජනාධිපතිවරයකු පත් කර ගත්ත ද අනුර කුමාර දිසානායක මහතා ද ගමන් කරනුයේ ගෝඨාභය රාජපක්ෂ මහතා ගමන්ගත් මාර්ගය ද රනිල් වික්‍රමසිංහ මහතාගේ ගමන් මාර්ගය ද යන්න සැකයක් පවතිනවා.
විපක්ෂය දුර්වල කිරීම සඳහා සමගි ජන බලවේගය සම්බන්ධයෙන් විවිධ අසත්‍ය ප්‍රචාරයන් ගෙනයමින් සිටිය ද දැවැන්ත පක්ෂයක් වන සමගි ජන බලවේගය තුළ කිසිදු බෙදීමක් නැති බවත් රනිල් වික්‍රමසිංහ මහතා සමඟ ඩීල් දැමූ ඇතැම් පුද්ගලයන් ඉවත් වෙමින් මේ වන විට තරුණයන්ට නායකත්වය ලබා දෙමින් සමගි ජන බලවේගය නවීකරණය හා නිවැරදි වෙමින් පවතින බව ද රෝහණ බණ්ඩාර මහතා පැවසීය.
ශ්‍රී ලංකා පොදු ජන පෙරමුණ කඩා වැටීම තුළ කිසිදු රාජපක්ෂවරයකු පාර්ලිමේන්තු මැතිවරණයට තරග කරන බවට දකින්නට නැති බවත් ගෑස් සිලින්ඩර පක්ෂය ද මේ වන විට අනාථ කඳවුරක් බවට පත්ව ඇති බවත් රෝහණ බණ්ඩාර මහතා වැඩිදුරටත් සඳහන් කළේය.
