හොරුන් බවට ලේබල් ගසාගත් පිරිස මෙවර පාර්ලිමේන්තුවට පත් නොකරන ලෙස මව්බිම ජනතා පක්ෂයේ සභාපති, හිටපු ක්‍රීඩා ඇමැති රොෂාන් රණසිංහ මහතා මෙරට ඡන්ද දායකයන්ගෙන් ඉල්ලා සිටියි. හිටපු ජනාධිපති රනිල් වික්‍රමසිංහ මහතා නියොජනය කරමින් ගෑස් සිලින්ඩරයෙන් මෙවර මහ මැතිවරනයට ඉදිරිපත් වන එම කණ්ඩායමේ සිටින පිරිසෙන් හොඳ අය සිටින බව කියා සිටි ඒ මහතා ඔවුන් පාර්ලිමේන්තුවට එවීමේ වරදක් නැතැයිද කියා සිටියේය. ඒ මහතා මේ බව කියා සිටියේ ඊයේ (18) කොළඹ ගංගාරාම විහාරස්ථානය වැඳ පුදා ගැනීමට පැමිණි අවස්ථාවේදී තමන් නියෝජනය කරන කඳවුරේ පළපුරුදු අය සිටින බැවින් ඔවුන් පාර්ලිමේන්තුවට තොරා පත් කරගන්නා ලෙස හිටපු ජනාධිපති රනිල් වික්‍රමසිංහ මහතා විශේෂ ප්‍රකාශයක් කරමින් කළ ප්‍රකාශය සම්බන්ධයෙන් මාධ්‍යවේදියකු නැඟූ ප්‍රශ්නයකට පිළිතුරු දෙමිනි.
ජනාධිපති අනුර කුමාර දිසානායක මහතා ආණ්ඩුව අරන් ඇතැයි කී ඒ මහතා විපක්ෂයේ සිට හඩක් නැඟීම තම අරමුණ බවද ඔහු කීවේය. ආණ්ඩුව පොරොන්දු ගොන්නක් දී තිබෙන බවත්, ඒවා ඉෂ්ට කිරීමට නොහැකි වුව හොත් ආණ්ඩුවේ බලය ගැනීමට ගැනීමට සූදානම් බවත් හෙතෙම කියා සිටියේය.
