මෙවර මහමැතිවරණය සඳහා වන්නි දිස්ත්‍රික්කය වෙනුවෙන් තරග වැදීමට ‘ප්‍රජාතන්ත්‍රවාදී ජාතික සන්ධානය’ ඉදිරිපත් කළ නාමයෝජනා පත්‍රය අදාළ තේරීම් භාර නිලධාරියා විසින් භාරගත යුතුව තිබූ බවට කළ පෙන්වා දීම අනුව කටයුතු කරන ලෙස ශ්‍රේෂ්ඨාධිකරණය ඊයේ (23) මැතිවරණ කොමිසමට නියෝග කළේය.
අදාළ නාමයෝජනා පත්‍රය ප්‍රතික්ෂේප කිරීමට දිස්ත්‍රික් තේරීම් භාර නිලධාරියා විසින් ගනු ලැබූ තීරණය බල රහිත කරන නියෝගක් නිකුත් කරන ලෙස ඉල්ලා ප්‍රජාතන්ත්‍රවාදී ජාතික සන්ධානය විසින් ගොනු කළ පෙත්සමෙහි තීන්දුව ප්‍රකාශ කරමින් මෙම නියෝගය කරන ලදි.
එම පෙත්සම් සම්බන්ධයෙන් ඉදිරිපත් වූ කරුණු සලකා බැලීමෙන් අනතුරුව අදාළ නාමයෝජනා පත්‍රය ප්‍රතික්ෂේප නොකර තේරීම් භාර නිලධාරියා විසින් පිළිගත යුතුව තිබූ බවට ශ්‍රේෂ්ඨාධිකරණය විසින් ඉකුත් 22 වැනිදා පෙන්වා දුන්නේය.
අදාළ තීන්දුව ප්‍රකාශ කිරීම සඳහා ප්‍රීති පද්මන් සූරසේන සහ අචල වෙංගප්පුලි යන මහත්වරුන්ගෙන් සමන්විත ශ්‍රේෂ්ඨාධිකරණ විනිසුරු මඬුල්ල හමුවේ මෙම පෙත්සම ඊයේ කැඳවනු ලැබිණි.
එහිදී මැතිවරණ කොමිසම වෙනුවෙන් අධිකරණය හමුවේ පෙනී සිටි නියෝජ්‍ය සොලිසිටර් ජනරාල් යුරේෂා ද සිල්වා මහත්මිය සඳහන් කළේ අදාළ නාමයෝජනා පත්‍රය තේරීම් භාර නිලධාරියා විසින් පිළිගත යුතුව ඇති බවට ශ්‍රේෂ්ඨාධිකරණය විසින් පෙර දිනයේ පෙන්වා දුන් කරුණ පිළිගැනීමට මැතිවරණ කොමිසම එකඟතාව පළ කර ඇති බවය.
ඒ අනුව අදාළ කරුණු පෙන්වාදීම අනුව කටයුතු කරන ලෙස ශ්‍රේෂ්ඨාධිකරණය මැතිවරණ කොමිසමට නියම කළේය.
මෙම පෙත්සම විභාගයට අවසන් කිරීමට නියම කරන ලදි.
‘ප්‍රජාතන්ත්‍රවාදී ජාතික සන්ධානයේ’ බලය ලත් නිලධාරී පරරාජසිංගම් උදය රාසා සහ තවත් අපේක්ෂකයන් දෙදෙනකු වන ජී. විජේන්ද්‍රන්රත්නම්, ඒ.කේ.ජී. සුබීහන් මෙම පෙත්සම්කරුවෝ වෙති.
මැතිවරණ කොමිසමේ සභාපති ඇතුළු එහි සාමාජිකයන්, වන්නි දිස්ත්‍රික් තේරීම් භාර නිලධාරියා, එම දිස්ත්‍රික්කයට තරග වදින දේශපාලන පක්ෂවල මහලේකම්වරුන්, නීතිපතිවරයා ඇතුළු පිරිසක් එහි වගඋත්තරකරුවෝ වෙති.
මහමැතිවරණයට තරග කිරීම සඳහා ‘ප්‍රජාතන්ත්‍රවාදී ජාතික සන්ධානයේ’ වන නාමයෝජනා පත්‍ර ඉකුත් ඔක්තෝබර් මස 11 වැනිදා දහවල් 12.00ට පෙර භාර දීමට නියමිතව තිබූ බව පෙත්සමෙහි සඳහන් වේ.
ඒ අනුව වන්නි දිස්ත්‍රික්කය වෙනුවෙන් තරග කිරීම සඳහා ‘ප්‍රජාතන්ත්‍රවාදී ජාතික සන්ධානයේ’ නාමයෝජනා පත්‍රය එහි තේරීම් භාර නිලධාරියාට ඉදිරිපත් කළ බව පෙත්සමෙහි සඳහන් වේ.
අදාළ නාමයෝජනා පත්‍රය විධිමත් ලෙස ඉදිරිපත් කර නැති බව පවසමින් තේරීම් භාර නිලධාරියා විසින් එය භාර ගැනීම ප්‍රතික්ෂේප කළ බව පෙත්සම්කරුවෝ පවසති.
සියලු ලේඛන විධිමත්ව ඉදිරිපත් කර තිබියදී සිය නාමයෝජනා පත්‍රය ප්‍රතික්ෂේප කිරීමට දිස්ත්‍රික් තේරීම් භාර නිලධාරියා ගනු ලැබූ තීරණය නීති විරෝධී සහ අත්තනෝමතික තීරණයක් බවට පෙත්සම්කරුවෝ චෝදනා කරති.
එබැවින් එම තීරණය බල රහිත කරන සර්ටියෝරාරි රිට් ආඥාවක් නිකුත් කරන ලෙස පෙත්සම මඟින් ඉල්ලා ඇත.
නොවැම්බර් මස 14 වැනිදා මහමැතිවරණයේදී වන්නි දිස්ත්‍රික්කයට නියෝජිතයන් තෝරා පත් කර ගැනීම සඳහා වන ඡන්ද විමසීම පැවැත්වීම අත්හිටුවන අතුරු තහනම් නියෝගයක් නිකුත් කරන ලෙස ද මෙම පෙත්සම මඟින් ඉල්ලා ඇත.
නීතිඥ සනත් විජේවර්ධන මහතාගේ උපදෙස් මත ජනාධිපති නීතිඥ එම්.යූ.එම්. අලිසබ්රි මහතා පෙත්සම්කරු වෙනුවෙන් පෙනී සිටියේය.
