සිය හෝටල් පරිශ්‍රයන් කැළි කසළ සහිතව අපවිත්‍රව හා අක්‍රමවත්ව පවත්වාගෙන යමින් මදුරුවන් බෝ වීමට තුඩු දෙන ලෙස කටයුතු කළ ඇල්ල සංචාරක පුරවරයේ මහා පරිමාණ සංචාරක හෝටල් 6කට එරෙහිව අධිකරණයේ නඩු පැවරීමට ඇල්ල මහජන සෞඛ්‍ය පරීක්ෂකවරයා පියවර ගෙන ඇත.
හෝටල්වලින් ඉවත දමන අපද්‍රව්‍ය හා ජලය රැඳී පැවතිය හැකි වෙනත් අබලි ද්‍රව්‍ය ඇතුළු විවිධ කැළි කසළ අක්‍රමවත්ව එම හෝටල් පරිශ්‍රයන් තුළ ගොඩගසා තිබීම මෙන්ම, ඇතැම් හෝටල්වල අවදානම් ලෙස අපජලය රැස්වන ස්ථාන පවත්වාගෙන යාම හේතුවෙන් මැස්සන් හා මදුරුවන් බෝ වීමේ අවදානම මත මෙසේ නඩු පවරා ඇත්තේ ඇල්ල නගර මධ්‍යයේ පිහිටි හෝටල් හිමියන් හය දෙනකුට එරෙහිවය. ඇල්ල මහජන සෞඛ්‍ය පරීක්ෂක ඩී.එම්. සාගර නන්දික ගුණසේකර මහතා, ප්‍රදේශයේ ඩෙංගු මර්දන සහායකවරුන් හා සෞඛ්‍ය කාර්ය සහායකවරුන් එක්ව අදාළ වැටලීම් සිදුකොට තිබේ.
