ශ්‍රී ලංකා මුහුදු සීමාවේදී අනවසර ධීවර කටයුතුවල නිරත වීම වැළැක්වීම සඳහා නීතිය නිසි ලෙස ක්‍රියාත්මක කිරීමට පෙරේදා (29) කොළඹදී පැවැති ඉන්දු – ශ්‍රී ලංකා ධීවර කටයුතු පිළිබඳ සාකච්ඡාවේදී දෙරටේම නියෝජිතයන් එකඟතාව පළ කර තිබේ.
එමෙන්ම ඉන්දු – ශ්‍රී ලංකා ධීවර කටයුතු පිළිබඳ දෙරටේ ධීවර සංවිධානයන්හි නියෝජිතයන්ගේ සහභාගිත්වයෙන් පවත්වන සාකච්ඡාව දෙසැම්බර් මස මුල් සතියේ පැවැත්වීමට ද මෙම සාකච්ඡාවේදී තීරණය වී ඇත.
ඉන්දු – ශ්‍රී ලංකා ධීවර කටයුතු පිළිබඳ ඒකාබද්ධ ක්‍රියාකාරී කමිටුවේ නිලධාරි මට්ටමේ 6 වැනි සාකච්ඡාව පසුගිය 29 වැනිදා පැවැත්වුණු අතර උතුරු නැඟෙනහිර මුහුදු සීමාවේදී ඉන්දීය යාත්‍රා මඟින් සිදු කරන තහනම් ධීවර කටයුතු වැළැක්වීම අරමුණු කර ගනිමින් මෙම කමිටුව ස්ථාපිත කරන ලදි. එය අවසන් වරට රැස්වී ඇත්තේ 2022 වසරේ මාර්තු මාසයේදීය.
උතුරු නැඟෙනහිර ප්‍රදේශ ආශ්‍රිත මුහුදු සීමාවට ඉන්දීය යාත්‍රා ඇතුළු වීම වැළැක්වීමට දෙරටේ නීතිය ක්‍රියාත්මක කිරීමේ බලධාරීන්ගේ ඒකාබද්ධ මුර සංචාරයන් තර කිරීම, දෙරට විසින් අත්අඩංගුවට ගත් ධීවරයන් සම්බන්ධයෙන් නීතිමය කටයුතු අවසන් කිරීමෙන් පසු එම ධීවරයන් කඩිනමින් නිදහස් කිරීම, දෙරටේ වෙරළාරක්ෂක බළකායන් විසින් පවත්වාගෙන යනු ලබන හදිසි ඇමැතුම් යන්ත්‍රණය ශක්තිමත් කිරීම, ශ්‍රී ලංකා මුහුදු සීමාවේදී මියගිය ඉන්දීය ධීවරයන් පිළිබඳ පවත්වන පරීක්ෂණවල වර්තමාන තත්ත්වය සොයා බැලීම සහ දෙරටේ පර්යේෂණ ආයතන විසින් ධීවර ක්ෂේත්‍රයට අදාළ ඒකාබද්ධ පර්යේෂණ පැවැත්වීම යන කරුණු පිළිබඳව ද මෙම නිලධාරි සාකච්ඡාවේදී විශේෂ අවධානයක් යොමු විය.
ඉන්දීය ධීවර යාත්‍රා මඟින් මෙරට මුහුදු සීමාවේ බොටම් ට්‍රෝලීන් ක්‍රමයට සිදු කරන ධීවර කටයුතු හේතුවෙන් සාගර සම්පත්වලට සිදුවන හානිය පිළිබඳ හා එය වැළැක්වීමට ක්‍රියා කිරීම සම්බන්ධව ශ්‍රී ලංකා නියෝජිතයන් මෙහිදී කරුණු අවධාරණය කර තිබේ.
ශ්‍රී ලංකාවේ බහුදින ධීවර යාත්‍රාවලට අරාබි මුහුදට ගමන් කිරීම සහ ආපසු පැමිණීමේ පහසුකම් සැලසීම සඳහා ඉන්දීය මුහුදු සීමාව හරහා ප්‍රවේශ මාර්ගයක් ලබාදෙන ලෙස ශ්‍රී ලංකාව කර ඇති ඉල්ලීමට කඩිනම් ප්‍රතිචාර දක්වන ලෙස ශ්‍රී ලංකා කණ්ඩායමේ නියෝජිතයන් මෙහිදී ඉල්ලීමක් කර ඇත. ධීවර කටයුතු පිළිබඳ ඒකාබද්ධ ක්‍රියාකාරී කණ්ඩායම් රැස්වීම් නිතිපතා පැවැත්වීමටත් එකඟතාව පළ වූ කරුණු පිළිබඳ ප්‍රගතිය අධීක්ෂණය කිරීමටත් දෙපාර්ශ්වයේ එකඟතාව මෙම සාකච්ඡාවේදී පළවිණි.
ශ්‍රී ලංකා නියෝජිත කණ්ඩායම, කෘෂිකර්ම, ඉඩම්, පශු සම්පත්, වාරිමාර්ග ධීවර හා ජලජ සම්පත් අමාත්‍යාංශයේ ලේකම් එම්.පී.එන්.එම් වික්‍රමසිංහ, ධීවර අමාත්‍යාංශ අතිරේක ලේකම් ධම්මික රණතුංග, ධීවර දෙපාර්තමේන්තුවේ අධ්‍යක්ෂ ජනරාල් සුසන්ත කහවත්ත, විදේශ කටයුතු අමාත්‍යාංශයේ අධ්‍යක්ෂ ජනරාල් නීලක කදුරුගමුව, අතිරේක සොලිසිටර් ජනරාල් විකුම් ඩී. ආබෲ, නාවික කොමදෝරු ඒ.ඩී. වීරසිංහ මහත්වරුන්ගෙන් සමන්විත විය.
ඉන්දීය නියෝජිත කණ්ඩායම ඉන්දීය ධීවර කටයුතු ලේකම් ආචාර්ය අභිලක්ෂී ලික්හි, ශ්‍රී ලංකාවේ ඉන්දීය මහකොමසාරිස් සන්තෝෂ් ජා, ඉන්දීය විදේශ කටයුතු අමාත්‍යාංශයේ අතිරේක ලේකම් ශ්‍රී ප්‍රනීට් අග්‍රවාල්, ඉන්දීය ධීවර කටයුතු ඒකාබද්ධ ලේකම් නීටු ප්‍රසාද් මහත්වරුන්ගෙන් සමන්විත විය.
