හෙරොයින් ජාවාරම් කිරීමෙන් වසර 2ක් ඇතුළත රුපියල් කෝටි 17ක මුදල් හා දේපළ උපයාගත් බවට චෝදනා කරමින් ප්‍රකට මත්ද්‍රව්‍ය ජාවාරම්කරුවකු වන වෙලේ සුදා නමැත්තාට එරෙහිව පවරා ඇති මුදල් විශුද්ධිකරණ නඩුවේ තීන්දුව දෙසැම්බර් 20 දා ප්‍රකාශ කිරීමට කොළඹ මහාධිකරණය දින නියම නියම කළේය. කොළඹ මහාධිකරණ විනිසුරු ආදිත්‍ය පටබැඳිගේ මහතා ඉදිරියේ ඊයේ (30) විභාගයට ගත් අවස්ථාවේ බූස්ස බන්ධනාගාරයේ රඳවා සිටින ගම්පොළ විදානගේ සමන්ත කුමාර හෙවත් වෙලේ සුදා නමැත්තා පොලිස් විශේෂ කාර්ය බළකායේ දැඩි ආරක්ෂාව යටතේ අධිකරණයට ඉදිරිපත් කරන ලදි.
වෙලේ සුදා නමැත්තාට අමතරව ඔහුගේ බිරිය හා සහෝදරියට එරෙහිව මුදල් විශුද්ධිකරණ පනත යටතේ නඩු පවරා තිබේ. ජනාධිපති නීතිඥ ශවේන්ද්‍ර ප්‍රනාන්දු මහතා විසින් ඊයේ (30) විත්තියේ දේශනය පවත්වන ලදී. අනතුරුව මහාධිකරණ විනිසුරුවරයා තීන්දුවට දින නියම කළේය.
වර්ෂ 2010 ජනවාරි පළමුවැනිදාත් 2012 අප්‍රේල් 25 වැනිදාත් අතර කාලය තුළදී කොළඹ හා අවට ප්‍රදේශ වලදී හෙරොයින් ජාවාරම් කිරීමෙන් මුදල් උපයාගැනීමට කුමන්ත්‍රණය කළ බවට සහ ඒ අනුව එලෙස හෙරොයින් ජාවාරම් කර මුදල් හා දේපළ උපයාගත් බවට නීතිපතිවරයා විසින් චෝදනා 57ක් මත විත්තිකරුවන්ට එරෙහිව නඩු පවරා ඇත. නියෝජ්‍ය සොලිසිටර් ජනරාල් සුදර්ශන ද සිල්වා මහතා පැමිණිල්ල මෙහෙයවීය.
