සිය දියණිය සමඟ මහ මඟ රාත්‍රියේ ගමන් ගනිමින් සිටි 35 හැවිරිදි කාන්තාවකගේ ගෙල බැඳි රුපියල් ලක්ෂ එකහමාරකට අධික වටිනාකමින් යුත් රන් මාලයක් සහ පෙන්ඩනයක් කොල්ල කා පලායමින් සිටි යතුරුපැදිකරුවකු මහත් පරිශ්‍රමයකින් අහසටද වෙඩි තබා පාලනය කර අත්අඩංගුවට ගත් බව හබරාදූව පොලීසිය කියයි.
පැමිණිලිකාරිය පෙරේදා (29) රාත්‍රී 07.30ට පමණ ඇයගේ දියණිය උපකාරක පන්තියෙන් රැගෙන ඇයගේ නිවෙසට පයින් යමින් සිටියදී යතුරුපැදියකින් පැමිණි අයකු ඔවුන් බිය ගන්වා කාන්තාවගේ ගෙලෙහි වූ රන් මාලය කඩා පැහැරගෙන ගොස් තිබිණි. ඇය දුන් තොරතුරුවලට අනුව ක්ෂණිකව ක්‍රියාත්මක වූ පොලිස් කණ්ඩායමක් ජීප් රියකින් හා යතුරුපැදියකින් ගොස් මිනිත්තු 15ක් ඇතුළත සැකකරු අත්අඩංගුවට ගෙන ඇති අතර, එහිදී සැකකරු නවතා අත්අඩංගුවට ගැනීම සඳහා පොලිස් නිලධාරීන්ට අහසට වෙඩි තැබීමටද සිදු වී තිබිණි. අත්අඩංගුවට ගත් සැකකරු අහංගම ප්‍රදේශයේම පදිංචි වයස අවුරුදු 30ක අයකු බව පොලීසිය කියයි.
හබරාදූව පොලිස් ස්ථානාධිපති (ප්‍ර.පො.ප) චම්ලි ගුණතිලක, (පො.කො) 74839 ගුණතිලක, 40525 ඩිල්හාන්, 97371 ජයසිංහ, 18471 ධනංජය යන නිලධාරීහු මේ වැටලීම සිදු කළහ.
