නාච්චාදූව මඩවලගම ග්‍රාම සේවා වසමේ අතුරුවැල්ල ප්‍රදේශයේ පැවැත්වූ නීති විරෝධී මත්පැන් සාදයකදී, සැක කටයුතු ලෙස පුද්ගලයකු මිය යෑමේ සිද්ධිය සම්බන්ධයෙන් පුද්ගලයන් සිව් දෙනකු පෙරේදා (29දා) අත්අඩංගුවට ගනු ලැබූ බව හිදෝගම පොලිසිය පවසයි.
මෙලෙස අත්අඩංගුවට පත්ව ඇත්තේ නාච්චාදූව අතුරුවැල්ල සහ අනුරාධපුර ගල්කුලම යන ප්‍රදේශවල පදිංචි වයස අවුරුදු 30ත් 34ත්, අතර වියේ පසුවන පුද්ගලයන් සිව් දෙනෙකි.
මෙහිදී ජීවිතක්ෂයට පත්ව තිබුණේ නාච්චදුව, අතුරුවැල්ල ප්‍රදේශයේ පදිංචිව සිටි ටිකිරි බණ්ඩාගේ විජේකෝන් බණ්ඩාර නමැති 68 හැවිරිදි පුද්ගලයෙකි.
නාච්චාදූව, අතුරුවැල්ල ප්‍රදේශයේදී ඉකුත් 27 වැනිදා පිරිසක් සාදයක් පවත්වමින් නීති විරෝධී මත්පැන් (කසිප්පු) පානය කරමින් සිට ඇති බවත් එම සාදය සඳහා අට දෙනකු පමණ සහභාගි වී ඇති බවත් පොලිසිය කියයි.
සාදය අවසානයේ එම ස්ථානයේ ඉතිරිව සිට ඇත්තේ මරණකරුත් තවත් පුද්ගලයකුත් පමණක් වන අතර තමන් සමඟ සිටි මිත්‍රයා සිහිසුන්ව ඇති බව පවසමින් එම පුද්ගලයා මාර්ගයේ ගමන් කළ යතුරු පැදියක ආධාරයෙන් මරණකරු නාච්චාදූව රෝහලට රැගෙන ගොස් තිබූ බව පොලිසිය කියයි.
කෙසේ වෙතත් එම පුද්ගලයා රෝහල්ගත කරන අවස්ථාවේදී මරණයට පත්ව සිටි බවට තොරතුරු හෙළිව ඇතැයි ද පොලිසිය සඳහන් කරයි.
ඒ අනුව එම සැක කටයුතු මරණය සම්බන්ධයෙන් ස්ථානීය පරීක්ෂණයට ගිය අනුරාධපුර නාගරික සහ හිදෝගම හදිසි මරණ පරීක්ෂක ජේ. එම්. ජයතිලක මහතා විසින් එම සාදයට සම්බන්ධ පුද්ගලයන් පිරිසක් කැඳවා, සාක්ෂි සටහන් කර ගැනීමේදී, කසිප්පු පැකට්ටුවක් වෙනුවෙන් බහින් බස්වීමක් ඇතිවී, පහරදීමක් සිදුව ඇති බවට අනාවරණය වීමෙන් පසුව, පොලිසිය ප්‍රකාශ සටහන් කර ගෙන සැකකරුවන් අත්අඩංගුවට ගෙන තිබේ.
හිසට පහර දීමෙන් මොළයට රුධිරය වහනය වීම සහ මොට ආයුධයකින් පහරදීම හේතුවෙන් බෙල්ලේ ඉහළ කොටසට හානි සිදුවී මරණය සිදුව ඇති බවට පශ්චාත් මරණ පරීක්ෂණයේදී අනාවරණය වූ බවද පොලිසිය සඳහන් කළේය.
මෙම මරණය ආරංචි වීමත් සමඟ මරණකරුගේ බිරිය හදිසි රෝගී තත්ත්වයක් හේතුවෙන් රෝහල්ගතකර ඇති බවද පොලිසිය සඳහන් කළේය.
හදිසි රෝගී තත්ත්වයකින් සිහිසුන් වූ බව පවසමින් මරණකරුට පහර දුන් පුද්ගලයා විසින්ම ඔහු රෝහල්ගත කර ඇති බවත්, මරණකරු රැගෙන යෑම සඳහා යතුරු පැදියක් නවතා ආධාර ඉල්ලු අවස්ථාවේදී එම යතුරු පැදියේ ගමන් කර ඇත්තේ මරණකරුගේ ඥාති පුතකු බවත් සාක්ෂි සටහන් කර ගැනීමේදී අනාවරණය විය.
