ක්‍රිකට් තරගයකට සහභාගි වීම සඳහා විදේශගත වී සිටි ශ්‍රී ලංකා ක්‍රිකට් තේරීම් කමිටු සභාපති උපුල් තරංග වරුෂවිතාන මහතා අත්අඩංගුවට ගන්නා ලෙස නියම කරමින් මාතලේ මහාධිකරණය මඟින් නිකුත් කරන ලද වරෙන්තුව ආපසු කැඳවීමට අභියාචනාධිකරණය ඊයේ (30) නියෝග කළේය.
මහනුවර පල්ලෙකැලේ ජාත්‍යන්තර ක්‍රීඩාංගණයේදී පසුගියදා පැවැති ‘ලෙජන්ඩ් ක්‍රිකට් ට්‍රෝෆි’ තරගාවලියේදී තරග පාවාදීම සඳහා බලපෑම් සිදු කළේ යැයි චෝදනා කරමින් ඉන්දීය ජාතික ක්‍රිකට් කළමනාකරුවකු වූ අමිත් පටෙල් හෙවත් යෝගී පටෙල්ට එරෙහිව ගොනු කර ඇති නඩුව මාතලේ මහාධිකරණය හමුවේ විභාගය සඳහා කැඳවන අවස්ථාවේ එම අධිකරණය හමුවේ පෙනී සිටින බවට උපුල් තරංග මහතා සිය නීතිඥවරයා මඟින් ප්‍රතිඥාවක් දීමෙන් අනතුරුව මෙම නියෝගය නිකුත් කරන ලදි.
මාතලේ මහාධිකරණය මඟින් තමන්ව අත්අඩංගුවට ගෙන ඉදිරිපත් කරන ලෙස නියම කරමින් නිකුත් කළ වරෙන්තුව බලරහිත කිරීමේ නියෝගයක් ලබා දෙන ලෙස ඉල්ලා උපුල් තරංග මහතා විසින් ඉදිරිපත් කළ පෙත්සමක් කැඳවූ අවස්ථාවේදී මෙම ප්‍රතිඥාව දෙන ලදි.
මොහොමඩ් ලෆාර් තාහීර් සහ පී. කුමාරන් රත්නම් යන මහත්වරුන්ගෙන් සමන්විත අභියාචනාධිකරණ විනිසුරු මඬුල්ල හමුවේ මෙම පෙත්සම කැඳවනු ලැබිණි.
එහිදී අධිකරණය මීට පෙර කළ නියෝගයකට අනුව උපුල් තරංග මහතා අභියාචනාධිකරණය හමුවේ පෙනී සිටියේය.
මෙම පෙත්සම කැඳවූ අවස්ථාවේදී නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් මනෝහර ජයසිංහ මහතා අධිකරණය හමුවේ කරුණු දක්වමින් මෙම නඩුවේ පැමිණිලිකරු වූ උපුල් තරංග මහතා නිසි දැනුම් දීමකින් තොරව ඉකුත් 08 වැනිදා අධිකරණය හමුවේ සාක්ෂි දීම සඳහා පෙනී සිට නැති බව සඳහන් කළේය.
කලින් දිනයේ පෙනී සිටිය හැකි බවට අධිකරණයේ පොරොන්දු වී සාක්ෂි දීම සඳහා අධිකරණයට නොපැමිණීම බරපතළ කරුණක් බව ඔහු පෙන්වා දුන්නේය.
එමඟින් ඔහු අධිකරණයේ බලය අවමානයට ලක් කර ඇති බව සඳහන් කළ අතිරේක සොලිසිටර් ජනරාල්වරයා ඔහු වගකීම් විරහිතව කටයුතු කර ඇති බව සඳහන් කළේය.
උපුල් තරංග මහතා වෙනුවෙන් පෙනී සිටි නීතිඥ නිෂාන් ප්‍රේමතිරත්න මහතා එම චෝදනා ප්‍රතික්ෂේප කළේය.
ක්‍රිකට් තරගාවලියක් සඳහා අමෙරිකාවට පිටත්ව යෑම නිසා සාක්ෂි දීම සඳහා ඔහුට අධිකරණය හමුවේ පෙනී සිටීමට නොහැකි වූ බව නීතිඥවරයා කීය.
ඔහු විදේශගතවීමට පෙර ක්‍රීඩා දූෂණ විමර්ශන ඒකකයේ නිලධාරීන්ට ඒ පිළිබඳව ලිඛිතව දැනුම් දුන් බව ද එසේ තිබියදී අධිකරණයේ පෙනී නොසිටීමේ හේතුව මත ඔහු අත්අඩංගුවට ගැනීම සඳහා වරෙන්තු ලබා ගැනීම අසාධාරණ බව ද නීතිඥවරයා සඳහන් කළේය.
ක්‍රීඩා දූෂණ හෙළි කිරීමට ඉදිරිපත් වන පුද්ගලයන් මෙවැනි ක්‍රියා හේතුවෙන් අධෛර්යයට පත්වනු ඇති බවට නීතිඥවරයා කරුණු ඉදිරිපත් කළේය.
මෙහිදී විනිසුරු මොහොමඩ් ලෆාර් මහතා පෙන්වා දුන්නේ පෙත්සම්කරු මෙම නඩුවේ සාක්ෂිකරුවකු වන බවය.
මෙවැනි තත්ත්වයකදී පොතට සීමා වී තීන්දු දීම සුදුසු නොවන අතර ප්‍රායෝගිකව කල්පනා කළ යුතු බව විනිසුරුවරයා එහිදී අතිරේක සොලිසිටර් ජනරාල්වරයාට පෙන්වා දුන්නේය.
”ගුවන්තොටුපොළේදී අත්අඩංගුවට ගෙන ඉදිරිපත් කරන්න කියලා වරෙන්තු ඉල්ලන්න මොහු ත්‍රස්තවාදියෙක් ද?” යනුවෙන් විනිසුරු ලෆාර් තාහීර් මහතා ප්‍රශ්න කර සිටියේය.
එම නඩුවේ සාක්ෂි සටහන් කර ගැනීමට නියමිත ඉදිරි දිනවල මාතලේ මහාධිකරණය හමුවේ පෙනී සිටින බවට ප්‍රතිඥාවක් ලබාදෙන බව උපුල් තරංග මහතා වෙනුවෙන් පෙනී සිටි නීතිඥ නිශාන් ප්‍රේමතිරත්න මහතා එහිදී සඳහන් කළේය.
ඒ අනුව ඔහුට එරෙහිව නිකුත් කර තිබෙන වරෙන්තුව ආපසු කැඳවන ලෙස ඔහු අධිකරණයෙන් ඉල්ලා සිටියේය.
ඒ අනුව කරුණු සලකා බැලූ විනිසුරු මඬුල්ල මාතලේ මහාධිකරණය මඟින් නිකුත් කළ එම වරෙන්තුව ආපසු කැඳවන ලෙස නියම කළේය.
පෙත්සම් විභාගය අවසන් කිරීමට විනිසුරු මඬුල්ල තීරණය කළේය.
නීතිඥ ගමිදු කරුණාසේන මහතාගේ උපදෙස් මත ෂෙනාලි ඩයස් සහ විකුම් ජයසිංහ යන නීතිඥවරු සමඟ ජ්‍යෙෂ්ඨ නීතිඥ නිශාන් සිඩ්නි ප්‍රේමතිරත්න මහතා පෙත්සම්කරු වෙනුවෙන් පෙනී සිටියහ.
