ගණිත විෂය උගන්වන මුවාවෙන් වයස අවුරුදු 14 හා 15 දැරියන් දෙදෙනකුට ලිංගික අතවර කළ හොරණ වගවත්ත ප්‍රදේශයේ පාසලක ගණිත ගුරුවරයකු අත්අඩංගුවට ගත් බව හොරණ මූලස්ථාන පොලිසිය පවසයි.
කොළඹ ළමා ආරක්ෂණ අධිකාරියට එම ලිංගික අතවර සම්බන්ධයෙන් ලද දුරකතන පණිවිඩයක් අනුව ලද පැමිණිල්ලකට අදාළව විමර්ශන ආරම්භ කර වින්දිත දැරියන් දෙදෙනාගෙන් ප්‍රකාශ සටහන් කර ගැනීමෙන් අනතුරුව සැකකාර ගුරුවරයා පෙරේදා (29) රාත්‍රි අත්අඩංගුවට ගෙන ඇත. විද්‍යාලයේ ගුරු විවේකාගාරයේදී සැකකාර ගුරුවරයා දැරියන්ට ලිංගික අතවර සිදුකර තිබූ අතර ඒ සම්බන්ධයෙන් ඇසින් දුටු සාක්ෂියක්ද පොලිසිය වෙත ඉදිරිපත්ව තිබූ බව පොලිස් ආරංචි මාර්ග සඳහන් කරයි. වින්දිත දැරියන්ගේ ප්‍රකාශයන් හා ඇසින් දුටු සාක්ෂිකරුවකුගේ ප්‍රකාශ අනුව ලිංගික අතවර සිදු කළ හොරණ පොකුණුවිට වැලිගම්පිටිය ප්‍රදේශයේ පදිංචි 47 හැවිරිදි සැකකාර විවාහක ගුරුවරයා අත්අඩංගුවට ගෙන ඇත.
සැකකරු හොරණ මහේස්ත්‍රාත් අධිකරණය වෙත ඉදිරිපත් කිරීමට නියමිතය.
