අප්‍රිකානු සූකර උණ රෝගය (African swine fever) ආසාදිත හෝ අවදානම් ප්‍රදේශ ලෙස මෙරට සියලු ප්‍රාදේශීය ලේකම් කොට්ඨාස නම් කරමින් සත්ත්ව නිෂ්පාදන හා සෞඛ්‍ය දෙපාර්තමේන්තුවේ අධ්‍යක්ෂ ජනරාල් හේමාලි කොතලාවල මහත්මිය විසින් නිකුත් කර තිබූ විශේෂ ගැසට් නිවේදනය ලිහිල් කරමින් නිරෝගී සතුන් ප්‍රවාහනය සඳහා අවසර ලබා දෙමින් නව ගැසට්ටුවක් නිකුත් කර තිබේ. නව ගැසට් නිවේදනය පෙරේදා (05) නිකුත් කර තිබෙන අතර නැවත දෙනුම් දෙනතුරු එම ගැසට් නිවේදනය බලාත්මක බව සත්ත්ව නිෂ්පාදන හා සෞඛ්‍ය දෙපාර්තමේන්තුව පවසයි.
සූකර උණ රෝගය නොවැලඳුණු සතුන් සිටින බවට පශු වෛද්‍යවරුන් තහවුරු කළ ගොවිපොළවල සිටින සතුන් ප්‍රවාහනය කිරීමටත් මස් පිණිස ඝාතනය කිරීමටත් මේ අනුව අවසර ලැබෙන බව කොතලාවල මහත්මිය කීවාය. සතුන් හා මස් ප්‍රවාහනය කළ හැකි වන්නේ පශු වෛද්‍යවරයකු විසින් නිකුත් කරනු ලබන සත්ත්ව සෞඛ්‍ය වාර්තාවක් සමඟ යැයි ද ඇය කීවාය.
