බදුල්ල – මහියංගණය මාර්ගයේදී පසුගිය මස 31 වැනි දින විශ්වවිද්‍යාල සිසුවියන් දෙදෙනකුට මරු කැඳවමින් තවත් 39 දෙනකුට බරපතළ තුවාල සිදු කරමින් බස් අනතුර සිදු වූ අවස්ථාවේ රෝගීන් රෝහල් වෙත ගෙන යෑම, රෝහලේදී ඇප උපස්ථාන කිරීම සහ රෝගීන් ඇතුළු ඔවුන්ගේ පවුල්වල සාමාජිකයන්ට උදව් උපකාර කළ ආයතන හා පුද්ගලයන් අගයමින් ප්‍රශංසා සහතිකපත් ලබා දීමට ඌව පළාත් ආණ්ඩුකාර ජේ .එම්. කපිල ජයසේකර මහතා ඊයේ (6) පියවර ගත්තේය.
කොතලාවල ආරක්ෂක විශ්වවිද්‍යාලයේ සූරියවැව මණ්ඩපයේ සිසුන්, කථිකාචාර්යවරුන් ඇතුළු පිරිසක් ගමන් කරමින් තිබූ බස් රථයක් එහිදී අනතුරට ලක්ව තිබූ අතර, එම අනතුර සිදු වූ අවස්ථාවේදී ඒ සඳහා සක්‍රියව දායකත්වය ලබා දුන් බදුල්ල ශික්ෂණ රෝහල, ඌව වෙල්ලස්ස විශ්වවිද්‍යාලය, සමාජ මාධ්‍ය ක්‍රියාකරුවන් සහ රෝගීන්ගේ මවුපියන් ඇතුළු ඥතීන්ට නවාතැන් පහසුකම් ලබා දුන් හෝටල් හිමිකරුවන් අගයමින් මෙම ප්‍රශංසා සහතික ප්‍රදානය කිරීම සිදු විය.
