ලොව පුරා එළැඹ තිබෙන ශීත ඍතුව වෙනුවෙන් රුසියාවේ සිට අසූර් ගුවන් සේවයේ ( Azur Air) මංගල ගුවන් යානය (Inogaral Flight) එරට සංචාරකයන් පිරිසක් රැගෙන ඊයේ (6) උදෑසන කටුනායක ගුවන් තොටුපොළ වෙත පැමිණ තිබුණි.
අසූර් එයාර් ගුවන් සේවයේ ඉසෙඩ්.එෆ්. – 1611 දරන මෙම ගුවන් යානය ඊයේ (6) උදෑසන 10.5ට රුසියාවේ වෙනිකොව් නුවර සිට කටුනායක ගුවන් තොටුපොළ වෙත පැමිණ තිබුණි. මෙම ගුවන් යානය පිළිගැනීම සඳහා ජල ආචාර (Water Salute) පැවැත්වීමට කටුනායක ගුවන් බලධාරීහු පියවර ගත්හ. මෙම මංගල ගුවන් ගමන සඳහා අසූර් එයාර් ගුවන් සේවය විසින් බෝයිං – 767 වර්ගයේ ගුවන් යානයක් යොදවනු ලැබ තිබූ අතර, එහි ගුවන් මගීන් 332ක් සහ ගුවන් යානා කාර්ය මණ්ඩලය ලෙස තවත් 10 දෙනෙක් ද පැමිණ සිටියහ.
ඒ අනුව නොවැම්බර් මස 6 වැනි දින සිට සෑම සතියකම අසූර් එයාර් ගුවන් සේවය රුසියාවේ ප්‍රධාන නගර 5ක සිට එනම්, වෙනිකොව්, සෙන්ට් පීටර්ස්බර්ග්,ක්‍රොසනොස්කො
සෝච් සහ නොවිසිබිස්ක් යන නගරවල සිට කටුනායක ගුවන් තොටුපොළ වෙත පැමිණීමට නියමිත බව එම ගුවන් සේවයේ ශ්‍රී ලංකාවේ කළමනාකරු මොරිස් ද සිල්වා මහතා පැවසීය. එසේම මෙම අසූර් එයාර් ගුවන් යානාවලට රුසියාවේ එම ගමනාන්ත වෙත ළඟා වීමට පැය 9ක කාලයක් ගතවන අතර, මෙම ගුවන් යානා එළැඹෙන 2025 වසරේ අප්‍රියෙල් මස 30 දින තෙක් කටුනායක ගුවන් තොටුපොළ වෙත පැමිණීමට නියමිතය.
