මාතලේ, පල්ලෙපොළ නගරයේදී පාසල් සිසුන් දෙදෙනකුට පහරදීමේ සිද්ධියකට අදාළව නිවාඩු ලබා පැමිණ සිටි යුද හමුදා සෙබළුන් තිදෙනකු ඊයේ (6) අත්අඩංගුවට ගත් බව මහවෙල පොලිසිය පැවසීය.
අදාළ පහරදීමෙන් තුවාල ලැබූ පල්ලෙපොළ නගරයේ ප්‍රධාන පාසලක 11 වසරේ ඉගෙනුම ලබන වයස අවුරුදු 17ක් වන පාසල් සිසුහු දෙදෙනා යටවත්ත ප්‍රාථමික රෝහලේ ප්‍රතිකාර ලබති. මෙම ගැටුම පල්ලෙපොළ නගරයේ ප්‍රධාන පාසලක සිසුන් දෙපිරිසක් අතර ඇති වූ බහින්බස් වීමක් පහරදීමක් දක්වා දුරදිග යෑමෙන් සිදු වූවක් වන අතර, එම සිද්ධියෙන් පහරකෑමට ලක්වූ එක් පාසල් සිසුවකුගේ සහෝදරයකු නිවාඩු ලබා පැමිණ සිටි යුද සෙබළුන් තිදෙනාගෙන් අයෙකි. ඔහු නිවාඩු ලබා පැමිණ සිටි අනෙක් හමුදා සෙබළුන් දෙදෙනා ද සමඟ පල්ලපොළ නගරයට පැමිණ නගරයේදී සිසුන් අතර ඇතිවූ ගැටුමට සම්බන්ධ පාසල් සිසුන් දෙදෙනාට මෙසේ පහර දී ඇති බවට පොලිසියට ලද පැමිණිල්ලකට අනුව අදාළ සෙබළුන් තිදෙනා අත්අඩංගුවට ගෙන ඇත.
අත්අඩංගුවට ගත් පලාලි හා වවුනියා යුද හමුදා කඳවුරුවලට අනුයුක්තව සේවය කරන පල්ලෙපොළ ප්‍රදේශයේම පදිංචි අදාළ යුද හමුදා සෙබළුන් තිදෙනා මාතලේ අධිකරණයට ඉදින්පත් කිරීමට නියමිතය. සිද්ධිය සම්බන්ධයෙන් වැඩිදුර පරීක්ෂණ මහවෙල පොලිසිය විසින් සිදු කරනු ලබයි.
