බළපිටිය, රන්දොඹේ, දම්නද විදුහල පවත්වාගෙන ගිය දෙමහල් ගොඩනැඟිල්ල වසර ගණනාවක් තිස්සේ කිසිම ප්රයෝජනයකට නොගෙන අත්හැර දැමීම නිසා විනාශ වෙමින් පවතී.
මෙම විදුහලට 1996දී වසර සියයක් පිරීම නිමිත්තෙන් රන්දොඹේ ගමේ උපන් ව්‍යාපාරිකයකු මෙන්ම දානපතියකු වූ ගරුමුණි පීටර් ද සිල්වා මහතාට පින් පිණිස ඒ මහතාගේ බිරිඳ සහ දූ දරුවන් විසින් ඉදිකරවන ලද ‘ජී. පී. ද සිල්වා අනුස්මරණ දෙමහල් ගොඩනැඟිල්ල එවකට අධ්‍යාපන ඇමැතිවරයා වූ රිචඩ් පතිරණ මහතා 1998 ඔක්තෝබර් මස දෙවැනි දින විවෘත කර තිබේ.
මුහුදු වෙරළ ආසන්නයේම පිහිටි මෙම පාසල 2004 වසරේ දී පැවති සුනාමි ව්‍යසනයට හසුවීමෙන් මෙම ස්ථානයෙන් පාසල ඉවත් කෙරිණි. රන්දොඹේ සුචිත්‍රාරාම විහාරස්ථානයෙන් පරිත්‍යාග කරන ලද භූමියක විදුහල ස්ථාපිත කිරීමෙන් පසු මෙම ගොඩනැඟිල්ල තනිවිය. පසුව දම්නද පෙර පාසල ටික කාලයක් පවත්වා ගෙන ගිය අතර එයද පසු කාලයේ දී මෙම ස්ථානයෙන් ඉවත් කර තිබේ.
රුපියල් ලක්ෂ ගණනකටවත් වර්තමානයේ ඉදි කළ නොහැකි මෙම ගොඩනැඟිල්ල කිසිම ප්‍රයෝජනයක් නොගෙන අත්හැර දැමීම නිසා විනාශ වෙමින් පවතී. වහලෙන් කොටසක් දැනටමත් දිරාපත් වී කඩා වැටී තිබේ. මේ ගොඩනැඟිල්ල තුළ රාත්‍රී කාලයේ දී නොයෙකුත් අපචාර ක්‍රියාවන් සිදුවන බවද ප්‍රදේශවාසීහු කියති. මෙම ප්‍රදේශයේ දැනට සංචාරක ව්‍යාපාරය දියුණු වෙමින් පවතින නිසා ඒ සඳහා වූ ආයතනයකට බද්දට හෝ ලබා දී ප්‍රයෝජනයක් ගන්නා ලෙස හෝ රජයේ වෙනත් කටයුත්තකට යොදා ගන්නා ලෙස ප්‍රදේශවාසීහු බලධාරින්ගෙන් ඉල්ලා සිටිති.
