- මෙහෙයුමට පොලීසියේ 17ක්
- පොලීසියට පිහියෙන් අනින්න හදලා
- දැඩි රැකවල් මැද සැකකරු හා පොලීසියේ තුන් දෙනෙක් එකම රෝහලේ
කොල්ලකෑම් ඇතුළු අපරාධ රැසකට සම්බන්ධව පොලීසි කීපයකට අවශ්‍යව සිටි ‘බැංගලෝරා“ නමැති සැකකරු පෙරේදා (7) රාත්‍රී දැඩි පරිශ්‍රමයක් යොදා අත්අඩංගුවට ගත් බව නාරාහේන්පිට පොලීසිය කියයි.
සැකකරු සන්තකයේ තිබී හෙරොයින් මත්කුඩු මිලිග්‍රෑම් 10,650ක් ද පොලිස් භාරයට ගෙන ඇත. සැකකරු අත්අඩංගුවට ගැනීමට යාමේදී ඇතිවූ ගැටුමෙන් පොලිස් නිලධාරීන් තිදෙනකු තුවාල ලබා රෝහල්ගතකර ඇති බවද පොලීසිය කියයි.
නාරාහේන්පිට පොලිස් වසමේ සිදු වූ රුපියල් ලක්ෂ 7ක මුදලක් ඇතුළු කොල්ලකෑම් කීපයකට අවශ්‍යව සිටි බැංගලෝරා නමැත්තා බොරැල්ල මැනීංටවුන් නි‍ෙවසට පැමිණ සිටින බවට පොලීසියට ලද තොරතුරකට අනුව පෙරේදා (07) රාත්‍රී පොලිස් නිලධාරීන් 17 දෙනෙකුගෙන් යුත් පිරිසක් එම නි‍ෙවස වටලා සැකකරු අත්අඩංගුවට ගත් බව පොලීසිය කියයි.
නි‍ෙවසේ මුළුතැන්ගෙයි පිටතට පැන යෑමට තැත් කළ සැකකරු පිටත සිටි පොලිස් නිලධාරීන්ට තියුණු ආයුධයකින් ඇන පලායාමට තැත් කිරීමේදී කොන්ක්‍රීට් තට්ටුවක් මත වැටී ඇති අතර එම අවස්ථාවේදී අත තිබූ තියුණු ආයුධය විසිවී ඇති අතර සෙසු පොලිස් නිලධාරීන් විසින් දැඩි පරිශ්‍රමයක් දරා සැකකරු මෙල්ල කර අත්අඩංගුවටගෙන ඇත.
අත්අඩංගුවට ගත් මෙම සැකකරු තවත් පුද්ගලයකු සමඟ එක්ව ඉකුත් පෙබරවාරි මස 20 වැනි දින නාරාහේන්පිට දාබරේ මාවතේ කිරිහලකට කඩාවැදී එහි හිමිකාරියගේ සැමියා වූ නාවික හමුදා පාලක ප්‍රධාන නිලධාරියාගේ (කොමිෂන් නොලත් නිලධාරී) ගෙල ප්‍රදේශයට විශාල ප්‍රමාණයේ මිටියක් තබා බිය ගන්වා බැංකු ගත කිරීමට සූදානම් කර තිබූ රුපියල් ලක්ෂ 7ක මුදලක් කොල්ලකා තිබූ බව පොලීසිය කියයි.
මිරිහාන පොලිස් වසමේ ඉන්ධන පිරවුම් හලක් කොල්ලකෑම, කරන්න පොලිස් වසමේ පුද්ගලයන් කිහිපදෙනෙකුට මරණීය තර්ජනය කිරීම, නාරහේන්පිට පොලිස් වසමේ පුද්ගලයන් කීප දෙනකුට පහර දීම සහ මරණීය තර්ජනය කිරීම සම්බන්ධයෙන් ද මෙම සැකකරු චෝදනා ලැබ ඇතැයි ද පොලීසිය සඳහන් කරයි.
තුවාල ලද පොලිස් නිලධාරීන් තිදෙනා කොළඹ ජාතික රෝහලට ඇතුළත් කර ඇති අතර සැකකරු ද තුවාල ලබා එම රෝහලේම වාට්ටු අංක 72 පොලිස් ආරක්ෂාව මධ්‍යයේ ප්‍රතිකාර ලබන බව උසස් පොලිස් නිලධාරියෙක් පැවසීය.
40 හැවිරිදි මෙම සැකකරු බොරැල්ල ප්‍රදේශයේ පදිංචිකරුවෙකි. නරාහේන්පිට පොලිසියේ ස්ථානාධිපති ප්‍රධාන පොලිස් පරීක්ෂක අකිල රණසිංහ මහතාගේ උපදෙස් මත එහි අපරාධ විමර්ශන අංශයේ ස්ථානාධිපති පොලිස් පරීක්ෂක පී.අයි. හෙට්ටිආරච්චි මහතා ඇතුළු කණ්ඩායමක් පරීක්ෂණ පවත්වයි.
