වරාය අධිකාරියේ හිටපු සභාපති ආචාර්ය ප්‍රියත් බන්දු වික්‍රම ඇතුළු විත්තිකරුවන් තිදෙනකුට එරෙහිව ගොනුකර ඇති අල්ලස් නඩුව ලබන ජනවාරි 23දා විභාග කිරීමට කොළඹ මහාධිකරණය දින නියම කළේය.
කොළඹ මහාධිකරණ විනිසුරු ආදිත්‍ය පටබැඳිගේ මහතා ඉදිරියේ ඊයේ (08දා) නඩුව කැඳවූ අවස්ථාවේ විත්තිකරුවන්ට එරෙහිව ඉදිරිපත් කර තිබූ අධිචෝදනා පත්‍රවල ගොනුකර තිබූ ඇතැම් චෝදනා තවදුරටත් ක්‍රියාත්මක නොකිරීමට අදහස් කරන බැවින් අධිචෝදනා සංශෝධනය කිරීමට පැමිණිල්ල අවසර ඉල්ලා සිටියේය.
කරුණු සලකා බැලූ මහාධිකරණ විනිසුරුවරයා අධිචෝදනා පත්‍රය සංශෝධනය කිරීමට අවසර දුන්නේය. ඒ අනුව පැමිණිල්ලේ පළමු සාක්ෂිකරුට ලබන නඩු දිනයේදී අධිකරණය හමුවේ පෙනී සිටීමට සිතාසි නියම විය. වරාය අධිකාරියේ හිටපු සභාපතිවරුන් දෙදෙනකු වන ආචාර්ය ප්‍රියත් බන්දු වික්‍රම සහ කපිතාන් නිහාල් කැප්පෙටිපොළ ඇතුළු තිදෙනකුට එරෙහිව පනවා ඇති අල්ලස් නඩුව විභාගයට ගත් අවස්ථාවේ විනිසුරුවරයා මෙම දැනුම් දීම කළේය.
2014 වසරේ සැප්තැම්බර් 30 වැනිදා සිට 2015 වසරේ ජනවාරි 07දා දක්වා කාලය තුළ වරාය අධිකාරියේ නිලධාරීන් ලෙස කටයුතු කරමින් ආයතනයට හිතාමතාම අයුතු පාඩු කිරීම ඇතුළු චෝදනා 10ක් යටතේ අල්ලස් හෝ දූෂණ චෝදනා විමර්ශන කොමිෂන් සභාව විසින් මෙම නඩුව පවරනු ලැබීය.
2015 ජනාධිපතිවරණය අවස්ථාවේ වරාය අධිකාරියේ සේවකයන් 319 දෙනකු නිල රාජකාරිවලින් බැහැරව ජනාධිපතිවරණයට තරග කළ මහින්ද රාජපක්ෂ මහතාගේ ප්‍රචාරක කටයුතුවල යොදවා ඔවුන්ට වැටුප් හා අතිකාල දීමනා ලෙස හයකෝටි පනස්ලක්ෂ අටදහස් එකසිය තුනක් ගෙවීම මඟින් අධිකාරියට පාඩු සිදුකිරීමේ වරදට නඩු පැවරීම සිදුකර තිබේ.
දණ්ඩ නීති සංග්‍රහයේ 113 (ආ) සහ 102 යන වගන්ති යටතේ සහ අල්ලස් හෝ දූෂණ පනතේ 1994 අංක 20, 2018 අංක 22 දරන පනත් යටතේ මෙම නඩු පැවරීම සිදුකර ඇත.
සාක්ෂිකරුවන් 90ක් හා නඩු 17ක් පැමිණිල්ල විසින් ගොනුකර ඇත. විත්තිකරුවන්ට ලක්ෂ 75ක ශරීර ඇප දෙකක් මත ඇප හිමිව තිබේ. නොවැම්බර් 8දා නඩුව යළි කැඳවීමට නියමිතය.
