වාණිජ බැංකුවක 35 වැනි සංවත්සරය වෙනුවෙන් දිනුම් ඇදීමක් පවතින බවට දැන්වීමක් පළ කර අන්තර්ජාලය ඔස්සේ රුපියල් (1,810,000) දහඅටලක්ෂ දහදාහක වංචාවක් සිදු කළැයි කියන සිද්ධියට අදාළව රක්ෂිත බන්ධනාගාරගතව සිටි අවුරුදු 17ක් වයසැති යුක්රේන ජාතික ළමයි දෙදෙනා රුපියල් ලක්ෂ 25 බැගින් වූ ශරීර ඇත මත මුදාහැරීමට නියෝග කළ කොළඹ ප්‍රධාන මහේස්ත්‍රාත් තිළිණ ගමගේ මහතා අගතියට පත් පාර්ශ්වය සඳහා මසකට ලක්ෂ තුන බැගින් මුදල් ගෙවීමට ඔවුන්ට ඊයේ (8) නියෝග කළේය.
මෙම සැකකරුවන් දෙදෙනා මෙම වංචාව සඳහා අගතියට පත් පාර්ශ්වයට අදාළ මුදල් ප්‍රමාණය සම්පූර්ණම ගෙවා නිම වන තෙක් විදේශ ගමන් බලපත්‍රය තහනම් කරන ලෙසටද මහේස්ත්‍රාත්වරයා නියෝග කළේය. අවුරුදු 17ක් වයසැති යුක්රේන ජාතික ලියුබෝමි සිවිට් (Liubomyr shvets) සහ නිකිට අර්හුනෝව් (Nikita urhunov) යන බාලවයස්කාර පිරිමි දරුවන් දෙදෙනෙකු මෙලෙස ඇපමත මුදාහැරීමට නියෝග කරනු ලැබුවේය. මෙම සිද්ධිය හා සම්බන්ධව පැමිණිලි දෙකක් මෙම සැකකරුවන්ට තිබෙන බවත් ඊට අදාළ සියලුම ගෙවීම් අගතියට පත් පාර්ශ්වයට ලබාදීම සඳහා අවශ්‍ය පියවර ගැනීමට සැකකරුවන්ට අවවාද ලබා දෙන ලෙස සැකකරුවන් වෙනුවෙන් පෙනී සිටි නීතිඥවරුන්ට මහේස්ත්‍රාත්වරයා දැන්වීය. පෞද්ගලික බැංකුවල ඇති ස්ථිර ආයෝජන තැන්පතුවලින් ගැනුම්කරුවන්ගේ මුදල් ක්‍රිප්ටො කරන්සි ක්‍රමයට වංචා කරන බව අපරාධ පරීක්ෂණ දෙපාර්තමේන්තුව අධිකරණයට දැනුම් දුන්නේය.
මෙම සිද්ධියට අදාළව මෙම සැකකරුවන් ලංකාවට පැමිණීමට පෙර යුක්රේනයේ සිට මෙම ව්‍යාජ ජාවාරම පවත්වාගෙන ගොස් තිබෙන බවත් ඒ සඳහා ශ්‍රී ලාංකිකයන් කිහිප දෙනෙකු ද සම්බන්ධ වී ඇති බවට අපරාධ පරීක්ෂණ දෙපාර්තමේන්තුව විසින් කරන ලද පැමිණිල්ල සලකා බැලීමෙන් අනතුරුව තවදුරටත් විමර්ශන කටයුතු සිදුකිරීම සඳහා අධිකරණය විසින් මෙම නියෝගය ලබා දෙන ලදි. මෙම සැකකරුවන් දෙදෙනා ලංකාවට ඒමට පෙර බැංකු ගිණුම් නිර්මාණය කර ජාවාරම ක්‍රියාත්මක කර තිබූ බව අපරාධ පරීක්ෂණ දෙපාර්තමේන්තුව අධිකරණයට දැනුම් දුන්නේය.
සිද්ධියට අදාළ සැකකරුවන් දෙදෙනාගේ ගුවන් ගමන් බලපත්‍ර අධිකරණයේ භාරයට ගන්නා ලෙසද අපරාධ පරීක්ෂණ දෙපාර්තමේන්තුව අධිකරණයට දැනුම් දුන්නේය . මෙම විදෙස් ජාතිකයන් දෙදෙනා හොටෙල් පැරඩයිස් කුරුඳුවත්ත දෙණියාය ප්‍රදේශයේ පදිංචි වී සිටි බවද අපරාධ පරීක්ෂණ දෙපාර්තමේන්තුව අධිකරණයට දැනුම් දුන්නේය. ගනේමුල්ල පාර කඩවත දෝන අයෝමා කාංචනී බෝතේජු යන කාන්තාව විසින් අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන අංශයේ අන්තර්ජාල ආවේක්ෂණ හා බුද්ධි ඒකකයට ඉකුත් 27 දින කරන ලද පැමිණිල්ලකට අනුව මෙම සිද්ධිය අධිකරණයට යොමු කිරීමෙන් අනතුරුව මහේස්ත්‍රාත්වරයා මෙම නියෝගය ලබා දුනි.
Facebook සමාජ මාධ්‍ය හරහා වාණිජ බැංකුවක 35 වැනි සංවත්සරය වෙනුවෙන් දිනුම් ඇදීමක් පවතින බවට දැන්වීමක් පළ කර තිබූ බවත්, එම දිනුම් ඇදීමට ඇතුළු වීමට අන්තර්ජාලය ඔස්සේ පියවරයන් අනුගමනය කිරීමට තිබූ බවද අපරාධ පරීක්ෂණ දෙපාර්තමේන්තුව අධිකරණයට දැනුම් දුන්නේය.
