නිසි නීති උපදෙස් ලබා දී තිබියදීත් සාපරාධී මූල්‍ය පරිහරණය හා සාපරාධී මනුෂ්‍ය ඝාතනවලට වගකිවයුතු හිටපු සෞඛ්‍ය අමාත්‍ය කෙහෙළිය රඹුක්වැල්ල මහතා අත්අඩංගුවට ගැනීම ප්‍රමාද කරන්නේ කුමන පදනමකින් ද යන්න විමසමින් හිටපු සෞඛ්‍ය ඇමැතිවරයා අත්අඩංගුවට ගන්නා ලෙස බලකරමින් අපරාධ පරීක්ෂණ දෙපාර්තමේන්තුව ඉදිරිපිට උද්ඝෝෂණයක් සිදු කළ බවට අත්අඩංගුවට ගෙන ඇප මත මුදා හැර ඇති වෛද්‍ය චමල් සංජීව , අල්ලස දූෂණයට එරෙහි පුරවැසි බලය සංවිධානයේ සභාපති කාමන්ත තුෂාර ඇතුළු එහි සාමාජිකයන් 10 දෙනාට එරෙහි නඩුව ලබන වසරේ මාර්තු මස 7 වනදා යළි කැඳවන ලෙස කොටුව මහේස්ත්‍රාත් තනූජා ලක්මාලි මහත්මිය ඊයේ (08) නියෝග කළාය.
සැකකරුවන්ට එරෙහි නඩුව විවෘත අධිකරණය හමුවේ කැඳවූ අවස්ථාවේදී මේ නියෝගය සිදු කළ මහේස්ත්‍රාත්වරිය අධීකරණයේ පෙනී නොසිටි මගෙන් රටට සංවිධානයේ සභාපති සංජය මහවත්තට වරෙන්තු නිකුත් කළාය.
කොටුව පොලීසිය විසින් සැකකරුවන් අත්අඩංගුවට ගෙන අධිකරණයට ඉදිරිපත් කිරිමෙන් අනතුරුව රක්ෂිත බන්ධනාගාරගත කර පසුව ඇප මත මුදා හැර ඇත්තේ මගෙන් රටට සංවිධානයේ සභාපති සංජය මහවත්ත, වෛද්‍ය චමල් සංජීව ජාමුනි කාමන්ත තුෂාර, රංජිත් කඹුරුහේන, ෂෙහාන් ටයිටස් බර්නර්ස්, සංජීව ධම්මික හේමසිරි, ප්‍රගීත් චානක, නෝනා මොරින් නූර් සහ චාන්දනී පෙරේරා යන අය වෙති.
