ව්‍යාපාරිකයකු මෙරටට ගෙනා රුපියල් ලක්ෂ 28කට ආසන්න වටිනාකමකින් යුත් රන් පෙන්ඩන් 4ක්, කටුනායක ගුවන්තොටුපොළේ දී සොරාගෙන ගිය තවත් ව්‍යාපාරික කාන්තාවක් පෙරේදා (07) ගුවන් තොටුපොළ පොලිසිය මගින් අත්අඩංගුවට ගනු ලැබීය.
මේ සිද්ධියේ පැමිණිලිකරු කොළඹ 10 ප්‍රදේශයේ පදිංචි 45 හැවිරිදි අයකු වන අතර, විවිධ භාණ්ඩ වර්ග මෙරටට රැගෙන විත් අලෙවි කිරීමේ ව්‍යාපාරයක යෙදී සිටින ව්‍යාපාරිකයකු බව පොලිසිය කියයි. පැමිණිලිකරු ඉකුත් 6 වැනිදා අලුයම 5.00ට ඩුබායි සිට ශ්‍රීලන්කන් ගුවන් යානයෙන් කටුනායක ගුවන් තොටුපොළට පැමිණ තිබිණි. ඔහු ග්‍රෑම් 118යි මිලි ග්‍රෑම් 980ක් බරැති රත්තරන් පෙන්ඩන් 4ක් මෙරටට රැගෙන විත් තිබූ බව පොලීසිය සඳහන් කරයි.
චොක්ලට් ලෙස පිටට පෙනෙන අයුරින් ඇසුරූ අසුරණයක දමා තිබූ මේ රන් පෙන්ඩන් හතර පැමිණිලිකරු විසින් ඇගේ ට්‍රොලියට දමා ඇත්තේ පිටවීමේ කවුන්ටරයේදී නැවත තමාට ලබා දෙන ලෙස ඉල්ලමින් බව ද පොලීසිය කියයි. එහෙත් සැකකාර ව්‍යාපාරික කාන්තාව ගුවන් තොටුපොළේ පරිලෝකන යන්ත්‍ර මගින් අදාළ බෑග පරීක්ෂාවට ලක් කිරීමෙන් පසු පැමිණිලිකරුට අයත් බෑගය ඔහුට ලබාදී ගුවන්තොටුපළින් පිටව ගොස් ඇතැයි ද පොලීසිය සඳහන් කරයි.
පසුව බෑගය පිරික්සීමේදී පෙන්ඩන් සහිත බෑගය නැති බව දැනගත් පැමිණිලිකරු මේ සම්බන්ධයෙන් පොලීසියට පැමිණිලි කර ඇත. ඒ අනුව පරීක්ෂණ මෙහෙය වූ පොලීසිය මීතොටමුල්ල, වැල්ලම්පිටිය ප්‍රදේශයේ පදිංචි 43 හැවිරිදි කාන්තාවක අත්අඩංගුවටගෙන තිබිණි.
මේ කාන්තාව ව්‍යාපාරිකයා විසින් ගුවන්තොටුපළේදී කරත්තයක දමාගෙන පිටතට රැගෙන එමින් තිබූ බෑගයක ආරක්ෂිතව දමා තිබුණු රන් පෙන්ඩන් හතර සොරකම් කර ඇති බව විමර්ශනවලින් අනාවරණය වී තිබේ. ග්‍රෑම් 1 19ක් පමණ වූ බරක් සහිත එම පෙන්ඩන් හතර ව්‍යාපාරිකයා ඩුබායිහිදී මිලදීගෙන තිබූ බව සඳහන්ය. එම රන් භාණ්ඩ බෑගයේ ඇති බව දැන සිටි කාන්තාව එය සොරාගෙන ඇතැයි පොලීසිය කියයි. කාන්තාව සොරාගත් රන් භාණ්ඩ සමඟ අත්අඩංගුවට ගෙන ඇත. ඇය අධිකරණයට ඉදිරිපත් කිරීමට නියමිතව තිබිණි. සොරා ගැනීමට ලක්වූ රන් භාණ්ඩ නීත්‍යනුකූලව මෙරටට රැගෙන එමින් තිබූ ඒවාදැයි රේගු පරීක්ෂණයක්ද ක්‍රියාත්මකය.
කටුනායක ගුවන් තොටුපළ පොලීසියේ ස්ථානාධිපති ප්‍රධාන පොලිස් පරීක්ෂක එල්මෝ මැල්කම් පේට් මහතාගේ උපදෙස් යටතේ පොලිස් පරීක්ෂක ප්‍රනාන්දු, පොලිස් සැරයන් (38226), (85188) දිලංග සහ කාන්තා පොලිස් කොස්තාපල් (12160) සෙව්වන්දි යන නිලධාරීහු සිද්ධිය සම්බන්ධයෙන් විමර්ශන සිදුකරති.
