මේ රටට නායකත්වය දුන් මහින්ද රාජපක්ෂ මහතා කළ විශිෂ්ට සේවාව අගයමින් මෙවර පාර්ලිමේන්තු මැතිවරණයේ දී ශ්‍රී ලංකා පොදුජන පෙරමුණට සාධනීය ජනවරමක් හිමිවන බව ශ්‍රී ලංකා පොදුජන පෙරමුණේ මාතලේ දිස්ත්‍රික් අපේක්ෂක නිශාන්ත ඩයස් බණ්ඩාර මහතා ප්‍රකාශ කරයි.
ඒ මහතා මේ බව සඳහන් කළේ බත්තරමුල්ල, නෙළුම් මාවතේ පිහිටි ශ්‍රී ලංකා පොදුජන පෙරමුණු පක්ෂ මූලස්ථානයේ දී පැවැති මාධ්‍ය හමුවට එක්වෙමිනි.
එහිදී වැඩිදුරටත් නිශාන්ත ඩයස් බණ්ඩාර මහතා මෙසේද පැවසීය.
මෙරට දේශපාලනයේ පසුගිය කාලයේ කතිකාවක් ගොඩනැඟුණා. තරුණයන්ට අවස්ථාව දෙන්න ඕනෑ කීවා. පක්ෂ විපක්ෂව කවුරු දේශපාලනය කළත් නිහතමානීව දේශපාලනයෙන් ඉවත් වෙලා අලුත් අයට අවස්ථාව දෙන්න ඕනෑ කියා ශ්‍රී ලංකා පොදුජන පෙරමුණ ගත් තීරණය සම්බන්ධයෙන් අපේ ගෞරවය පිරිනමනවා. ඒ වගේම රාජපක්ෂවරුත් මේ පක්ෂයේ නවකයන්ට අවස්ථාව දෙන්න පියවර ගෙන තිබෙනවා. ඒ නිසා බිම් මට්ටම නියෝජනය කළ හා දේශපාලනයට සම්බන්ධ නොවූ අපි වැනි අයට දේශපාලනයට එන්න අද අවස්ථාව ලැබී තිබෙනවා. නමුත් අපි මේ රටේ ජනතාව සමඟ සමීපව කටයුතු කළ පාර්ශ්වයක් ලෙස මෙවර දේශපාලනයට එන්න අවස්ථාව ලැබී තිබෙනවා. අලුත් ආණ්ඩුවක් හදා තිබෙනවා.මේ ආණ්ඩුව කරන වැඩපිළිවෙළ සම්බන්ධයෙන් පූර්විකා නොකියා ආණ්ඩුව කරන දේ සම්බන්ධයෙන් බලා සිටිනවා.
ජනතාවට දැවැන්ත වැඩ කොටසක් කළ දේශපාලන පක්ෂයක්. ඒ නිසා අපට වගකීමක් තිබෙනවා. ආණ්ඩුව තවමත් පක්ෂ දේශපාලනයේ නිරතව සිටිනවා. අනුර කුමාර දිසානායක මහතා ජනාධිපතිවරයා වූවාට පස්සේ ඔහුගේ ශෛලිය සියයට 50කින් පමණ වෙනස් කරගත්තා. ජනාධිපතිවරයා හොඳයි. ඔහු සමඟ සිටින කණ්ඩායම දෙස අප බැලිය යුතුයි.
අද මේ ආණ්ඩුව මොකක්ද කරන්නේ කියලා කතා කරන තැනට පත්වෙලා. ඔවුන් දහසක් දේ කිව්වා.දේශපාලන වේදිකාවේ ඕනෑ දෙයක් කියන්න පුළුවන්.
මාතලේ දිස්ත්‍රික්කයෙන් අපේක්ෂකයන් අටක් ඉදිරිපත් කර සිටිනවා. හත් දෙනෙක් පනහ පැනලා. මම තරුණයෙක් විදියට මාතලේ දිස්ත්‍රික්කයෙන් මැතිවරණයට ඉදිරිපත් වී සිටිනවා. මහින්ද රාජපක්ෂ මහතා මේ රටට කළ වැඩ කොටසට සාධනීය ජනවරමක් මෙවර පාර්ලිමේන්තු මැතිවරණයෙන් ශ්‍රී ලංකා පොදු ජන පෙරමුණට හිමිවෙනවාÓයැයි පැවසීය.
