මවට එල්ල කළ මන්නා ප්‍රහාරයක් වැළැක්වීමට ගිය පුතකු එම මන්නා ප්‍රහාරයෙන් තුවාල ලබා කළුතර නාගොඩ ශික්ෂණ රෝහලට ඇතුළත් කර ඇතැයි උතුරු කළුතර පොලිසිය කියයි. පෙරේදා (12) උදෑසන සිදු වූ මෙම සිද්ධියෙන් තුවාල ලබා රෝහල්ගත කර ඇත්තේ උතුරු කළුතර, නිග්‍රෝධාරාම පාරේ පදිංචිකරුවකු වූ ජුවාන් ගෝමිස්ගේ හිෂාන් මතීෂ පෙරේරා නම් පුද්ගලයෙකි.
තුවාලකරුගේ මව වන වීරවර්ණ කුලකුලසූරිය බූසාබදුගේ අනෝමා ප්‍රනාන්දු (55) යන අය විසින් පොලිසියට කරන ලද පැමිණිල්ල අනුව මේ පිළිබඳ පරීක්ෂණ ආරම්භ කොට තිබේ. ආරවුලක් මත පැමිණිලිකාරියට එල්ල කළ මන්නා ප්‍රහාරයක් වැළැක්වීමට පුතා මැදට පැන්න විට එම මන්නා පහර පුතාට වැදී ඇතැයි පොලිසිය කියයි.
මෙම සිද්ධියට අදාළ 22 හැවිරිදි සැකකරු අත්අඩංගුවට ගෙන තිබේ. ඔහු ඊයේ (13) කළුතර මහේස්ත්‍රාත් අධිකරණයට ඉදිරිපත් කිරීමට නියමිතව තිබිණි. උතුරු කළුතර පොලිස් ස්ථානාධිපති ප්‍රධාන පොලිස් පරීක්ෂක දමිත් කේ. ජයතිලක මහතාගේ මෙහෙයවීම යටතේ මේ පිළිබඳව වැඩිදුර පරීක්ෂණ පැවැත්වේ.
