රියර් අද්මිරාල් ඩේමියන් ප්‍රනාන්දු මහතා පෙළපාළිය පරීක්ෂා කරමින්
මව්බිමට එරෙහිව නැඟෙන ඕනෑම අභියෝගයක් ජයගැනීමට ඔබ සියලු දෙනා සූදානම් විය යුතු බව ශ්‍රී ලංකා නාවික හමුදා නියෝජ්‍ය මාණ්ඩලික ප්‍රධානි, නැඟෙනහිර නාවික ආඥාපති, රියර් අද්මිරාල් ඩේමියන් ප්‍රනාන්දු මහතා පැවැසීය.
ඒ මහතා මේ බව පැවැසුවේ නාවික හමුදා මැරීන් බළකායේ නව වැනි බඳවා ගැනීමට අයත් බළඇණි පාඨමාලාව සාර්ථකව හැදෑරූ නිලධාරීන් හත් දෙනකු සහ සෙසු නාවිකයන් විසි දෙනකුට නිල ලාංඡන පැලඳවීමේ අවස්ථාවට එක් වෙමිනි. මේ උත්සවය ත්රිකුණාමලය සාම්පූර් පිහිටි ශ්‍රී ලංකා නාවික නෞකා විදුර කඳවුරේදී පෙරේදා (19) පැවැත්විණි.
මෙහිදී වැඩිදුරටත් අදහස් දැක්වූ ඒ මහතා මෙලෙස ද කීවේය.
“පුහුණුවෙන් ලද පන්නරයෙන් මව්බිමේ ස්වෛරීභාවය, භෞමික අඛණ්ඩතාව සුරැකීමට ඔබ සියලු දෙනා දායක විය යුතුයි. රාජකාරි ජීවිතයේදී සහ පෞද්ගලික ජීවිතයේදී අධිෂ්ඨානයෙන් යුතුව කටයුතු කිරීමට මේ පුහුණුව ඔබට උපයෝගී කර ගත හැකියි. මව්බිමට එරෙහිව නැඟෙන ඕනෑම අභියෝගයක් ජයගැනීමට ඔබ සූදානම් විය යුතුයි. ඒ සඳහා සෑම විටම දැනුම සහ පුහුණුව යාවත්කාලීන කරගැනීම ඔබ සතු වගකීමක්.”
මේ පාඨමාලාවේ දක්ෂතම මැරීන් සාමාජිකයා ලෙස උප ලුතිනන් ආර්.එම්.සී. කරුණාරත්න, සියලු විෂයයන්ගෙන් වැඩිම ලකුණු ගත් සාමාජිකයා සහ දක්ෂතම ඉලක්කකරු ලෙස ලුතිනන් ඒ.එච්.ජී.සී. ද සිල්වා සහ දක්ෂතම ශාරීරික යෝග්‍යතාව හිමි සාමාජිකයා ලෙස උප ලුතිනන් ඩී.එම්.එච්.එස්.එල්. දිසානායක නිලධාරීහු මෙහිදී සම්මාන ලැබූහ. පුහුණුව ලැබූවන් මෙහිදී සංදර්ශනයක් ද ඉදිරිපත් කරන ලදි.
මේ අවස්ථාවට නාවික හමුදාවේ ධජ නිලධාරී කොමදෝරු සංජීව පෙරේරා, මැරීන් අධ්‍යක්ෂ කොමදෝරු රෝහන් දිසානායක සහ ශ්‍රී ලංකා නාවික නෞකා විදුර කඳවුරේ ආඥාපති කපිතාන් සංජීව කොඩිකාර මහත්වරු ද සහභාගි වූහ.
