සන්ධානගත පක්ෂ සහ අප පක්ෂය අතර ඇති කර ගත් අවබෝධතා ගිවිසුම් ප්‍රකාරව අප පක්ෂයට හිමි වූ ජාතික ලැයිස්තු ධුරයට අයකු නම් කිරීමට අපට ඇති අයිතිය අනුව ක්‍රියා කිරීම වරදක් හෝ අත්තනෝමතික ක්‍රියාවක් ලෙස යමකු දකින්නේ නම් අපට කිව හැක්කේ අප විසින් අවබෝධතා ගිවිසුමට පරිබාහිරව හෝ ඊට හානි වන කිසිවක් සිදු කර නැති බව යැයි නව ප්‍රජාතන්ත්‍රවාදී පෙරමුණේ ලේකම් ශ්‍යාමිලා පෙරේරා මහත්මිය සඳහන් කරන්නීය.
නව ප්‍රජාතන්ත්‍රවාදී පෙරමුණේ ජාතික ලැයිස්තු මන්ත්‍රී ධුරයක් සඳහා රවි කරුණානායක මහතා පත් කිරීම සම්බන්ධයෙන් ඇති වී තිබෙන තත්ත්වය ගැන කරුණු පැහැදිලි කරමින් ඇය මේ බව සඳහන් කර තිබේ.
“2024 නොවැම්බර් 18 වැනි දින වන විට ජාතික ලැයිස්තු මන්ත්‍රී ධුර නම් කළ යුතුව තිබුණු නමුදු ඒ වන තෙක් සන්ධානයේ සෙසු පක්ෂවල නියෝජනය මා වෙත දැනුම් දී නොතිබුණු නිසා අප පක්ෂය විසින් ගන්නා ලද තීරණය වූ රවි කරුණානායක මහතාගේ නම මැතිවරණ කොමිෂන් සභාව වෙත භාර දීමට කටයුතු කළා. ඊට පෙර අප පක්ෂය මඟින් ස්ථිර කරනු ලැබූ යෝජනාව රනිල් වික්‍රමසිංහ මහතා වෙත දැන්වීමට කටයුතු කළා.“ යැයි ශ්‍යාමිලා පෙරේරා මහත්මිය සඳහන් කරන්නීය.
