වර්ෂ 2020 සිට නායයෑමට ලක්ව ඇති රත්නපුර දෙමළ මහා විද්‍යාලය, රත්නපුර නවනගරය තුළ ස්ථාපිත කරන බව සබරගමු පළාත් ආණ්ඩුකාර චම්පා ජානකී රාජරත්න මහත්මිය සඳහන් කළාය. සබරගමු ආණ්ඩුකාරවරිය මේ බව සඳහන් කළේ (19) වැනිදා රත්නපුර නගර ශාලාවේ පැවැති එම විද්‍යාලයේ වාර්ෂික සංස්කෘතික ප්‍රසංගයට එක්වෙමිනි. මෙහිදී අදහස් දැක්වූ ආණ්ඩුකාරවරිය මෙසේද පැවසුවාය. ‘මා සබරගමුව ආණ්ඩුකාර ධුරයේ වැඩ භාර ගත් පසුව සබරගමුව පළාතේ සියලුම දෙමළ විද්‍යාලවල විදුහල්පතිවරුන් කැඳවා සාකච්ඡා කළා. එහිදී මතුවූ ගැටලු අතර රත්නපුර නගරය ආශ්‍රිතව පිහිටි රත්නපුර දෙමළ මහ විද්‍යාලය නාය යෑමට ලක්ව තිබෙනවා කියලා සඳහන් වුණා. ඒ අනුව මේ වන විට මෙම විද්‍යාලය රත්නපුර නවනගරයේ පිහිටි අක්කර පහක වපසරියකින් සමන්විත භූමි භාගයක ස්ථාපිත කිරීමට සබරගමුව පළාත් සභාව කටයුතු කර තිබෙනවා. එහි ඉදිකිරීම් කටයුතු පිළිබඳව අග්‍රාමාත්‍ය සහ අධ්‍යාපන විෂයභාර අමාත්‍ය හරිනි අමරසූරිය මෙණෙවිය සමඟ අප සාකච්ඡා කිරීමට කටයුතු කරනවා.’
