දෙහිවල ප්‍රදේශයේ නි‍ෙවසකට පහරදී රුපියල් ලක්ෂ ගණනාවක අලාභ කර රුපියල් ලක්ෂ 12කට අධික වටිනා රන් භාණ්ඩ සහ ජංගම දුරකතන හතරක් කොල්ලකෑ 6 දෙනාගේ කල්ලියේ දෙදෙනකු අත්අඩංගුවට ගත් බව ගල්කිස්ස කොට්ඨාස අපරාධ විමර්ශන අංශය කියයි.
එම සැකකරුවන් දෙදෙනාගෙන් අයකු සන්තකයේ තිබී අයිස් මත්ද්‍රව්‍ය මිලිගෑම් 12,150ක් සමඟ පහරදීමට යොදාගත් කඩු දෙකක්, කුඩයක්, පොලිස් භාරයට ගෙන ඇත.
ගල්කිස්ස, බඩෝවිට ප්‍රදේශයේ දෙපාර්ශ්වයක් අතර පවතින ගැටුමක ප්‍රතිඵලයක් ලෙස ඝාතනයට ලක් වූ පුද්ගලයකුගේ බිරියට පීහියෙන් ඇනීමට තැත් කිරීම සම්බන්ධයෙන් මෙම ප්‍රහාරය දියත් කර තිබූ බව පොලිස් විමර්ශනවලදී අනාවරණය වී තිබිණි.
සැකකරුවන් එම ප්‍රහාරය දියත් කරන අවස්ථාවේදී නිවැසියන් පලාගොස් තිබූ බවද පොලිසිය කියයි.
එම සිද්ධියට සම්බන්ධ සැකකරුවකු බඩෝවිට පාලම අසල රැඳී සිටින බවට ලද තොරතුරකට අනුව අත්අඩංගුවට ගෙන පරීක්ෂා කිරීමේදී ඔහු සන්තකයේ තිබී අයිස් මත්ද්‍රව්‍ය සොයා ගැනීමට හැකිවූ බව පොලීසියය කියයි.
අනතුරුව සැකකරුගෙන් කළ ප්‍රශ්න කිරීමේදී එම සිද්ධියට යොදාගත් කඩුවක් ඔහු පදිංචි බඩෝවිට නි‍ෙවස තුළ සඟවා තිබියදීත් එම සිද්ධියට සම්බන්ධ තවත් සැකකරුවකු ද අත්අඩංගුවට ගැනීමට හැකිවූ බව පොලිසිය සඳහන් කරයි.
අත්අඩංගුවට ගත් සැකකරුවන් දෙදෙනා වයස අවුරුදු 29 – 30 අතර පසුවන ගල්කිස්ස බඩෝවිට පදිංචිකරුවන්ය.
ගල්කිස්ස කොට්ඨාස භාර ජ්‍යෙෂ්ඨ පොලිස් අධිකාරී ප්‍රසන්න බ්‍රාහ්මණ පොලිස් අධිකාරි රෝහන් පුෂ්ප කුමාර මහත්වරුන්ගේ උපදෙස් මත ගල්කිස්ස කොට්ඨාස අපරාධ විමර්ශන අංශයේ ස්ථානාධිපති පොලිස් පරීක්ෂක අමිලෝ ගෝවින්න මහතාගේ මෙහෙයවීමෙන් වැඩිදුර පරීක්ෂණ පැවැත්වේ.
