අලුත්ගම නගරයේ බේරුවල ප්‍රාදේශීය සභා නගර ශාලාව ගොඩනැඟිල්ල ඉදිරියේදී ගාල්ල කොළඹ ප්‍රධාන මාර්ගයේ ඉකුත් 20 වැනිදා රාත්‍රියේ කොළඹ සිට මාතර දක්වා මගීන් පටවාගමන් ගත් පෞද්ගලික බස් රථයකට මාර්ග අංක 400 බස් රථයක් හා ත්‍රිරෝද රථයක් මාර්ගය හරස් කර පුද්ගලයන් පස් දෙනකු මාතර බස් රථයට හා එහි ගමන් ගත් රියැදුරුට කොන්දොස්තරට පහරදී බස් රථයේ ඉදිරිපස වීදුරු දෙකට හා පැති වීදුරුවකට රුපියල් 120,000ක පමණ අලාභානයක් සිදුකර ඇති සිද්ධියට සම්බන්ධ පුද්ගලයන් පස් දෙනාගෙන් තිදෙනකු ඊයේ (22) අලුයම අලුත්ගම පොලීසිය මඟින් අත්අඩංගුවට ගෙන තිබේ.
කොළඹ සිට මාතර දක්වා ධාවනය වූ බස් රථය අතරමඟදී පසුපසින් අලුත්ගම දෙසට පැමිණි බස් රථයට මගීන් පටවා ගැනීමේ අවස්ථාව අහිමි කරමින් තැනින් තැන බස් නැවතුම්වලින් මාතර බස් රථය මඟීන් පටවා ගැනීමට උරණ වී මෙම ආරවුල සිදුව ඇති බව විමර්ශන සිදු කරන අලුත්ගම පොලීසිය පවසයි.
සිද්ධියට සම්බන්ධ අලුත්ගම කොළඹ බස් රථයේ රියැදුරු හා කොන්දොස්තරවරයා අතරමඟදී මග්ගොන ප්‍රදේශයේ ත්‍රිරෝද රථයකට කතාකර එහි තවත් දෙදෙනෙකු පොලු මුගුරුද සමඟ කැඳවා මුලින් බස් රථය ප්‍රාදේශීය සභා නගර ශාලාව අසලදී මඟ හරස් කර පසුව ත්‍රිරෝද රථය පැමිණ මාර්ගය හරස්කර එම ත්‍රිරෝද රථයේ පැමිණ තිදෙනා හා අලුත්ගම කොළඹ බස් රථයේ රියැදුරු කොන්දොස්තර ඇතුළු පස්දෙනා මාතර බස් රථයේ ඉදිරිපස වීදුරු දෙකකට හා පැති ජනෙල් වීදුරුවකට අලාභහානි කර මාතර බස් රථයේ රියැදුරු හා කොන්දොස්තරට ද පහරදී පලා ගොස් තිබේ. මේ සම්බන්ධයෙන් මාතර බස් රථයේ රියැදුරා අලුත්ගම පොලීසියට කළ පැමිණිල්ල අනුව විමර්ශන ක්‍රියාත්මක කර තිබේ.
මෙම හේතුවෙන් මාතර දක්වා ගමන් කිරීමට පැමිණි මඟීන්ද දැඩි අපහසුතාවයට පත්ව වෙනත් බස් රථවලින් පිටත්ව ගොස් තිබේ.
මෙසේ පහර කෑමට ලක්ව ඇත්තේ තල්පාවිල පාර, දෙවිනුවර හා අලුත්ගොඩ, දික්වැල්ල යන ලිපිනයන්හි පදිංචි 51 – 49 යන වයස් කාණ්ඩවල පසුවන රියැදුරු හා කොන්දොස්තර යන දෙදෙනා බව පොලීසිය පවසයි. තරගකාරී ලෙස මඟීන් පටවා ගැනීමේ සිද්ධියක් මුල් කරගෙන මෙම පහරදීම සිදුකර ඇති බව පොලීසිය අනාවරණය කරගෙන තිබේ.
මේ වන විට පහරදීමේ සිද්ධියට සම්බන්ධ අලුත්ගම කොළඹ බස් රථයේ බෙන්තොට ප්‍රදේශයේ පදිංචි 49 හැවිරිදි රියැදුරුත් මග්ගොන ප්‍රදේශයේ පදිංචි 27 හැවිරිදි කොන්දොස්තර හා මග්ගොන ප්‍රදේශයේම පදිංචි 21 ත්‍රිරෝද රථ රියැදුරා අත්අඩංගුවට ගෙන තිබේ.
පහරදීමට ත්‍රිරෝද රියෙන් පැමිණි කොන්දොස්තරවරයාගේ මිතුරන් දෙදෙනකු වන සැකකරුවන් ප්‍රදේශයෙන් පලා ගොස් සැඟව ඇති බව පොලීසිය පවසයි.
සිද්ධිය සම්බන්ධයෙන් අත්අඩංගුවට ගත් සැකකරුවන් තිදෙනා අද (22) කළුතර මහේස්ත්‍රාත් අධිකරණයට ඉදිරිපත් කිරීමට නියමිතය.
