පුරාවිද්‍යා ස්ථානයක කැණීම් කටයුත්තක් හෝ කිසියම් අපරාධයක් සඳහා පැමිණ ඇති බවට සැකකරන යුද හමුදාවේ බ්‍රිගේඩියර්වරයකුට අයත් නිල ඇඳුම් කොටස් හා ව්‍යාජ ලෙස සකසා ගත් හැඳුනුම්පතක් සහිත පුද්ගලයකු, යුද හමුදාවේ සාමාජිකයන් දෙදෙනකු ඇතුළු පුද්ගලයන් එකොළොස් දෙනෙකු, මෝටර් රථ තුනක්, කැබ් රථයක් සමඟ පෙරේදා (23) රාත්‍රියේ වැලිකන්ද නාමල්ගම ප්‍රදේශයේ දී පොලිස් අත්අඩංගුවට ගෙන ඇත.
හමුදාවේ ඇඳුම් කොටස් තොගයක් සහ ව්‍යාජ හැඳුනුම්පතක් ළඟ තබාගත් සැකකරු බදුල්ල ප්‍රදේශයේ පදිංචිකරුවකු වන අතර යුද හමුදාවේ සේවයේ නියුතු අනෙක් දෙදෙනා ත්‍රිකුණාමලය හෙන්ද්‍රික් බළකොටුවේ ආරක්‍ෂාවේ නිරත වන පුද්ගලයන් බවට අනාවරණය වී ඇති බව ද වැලිකන්ද පොලීසිය සඳහන් කරයි.
අත්අඩංගුවට ගත් සෙසු සැකකරුවන් අට දෙනා යක්කල, පාදුක්ක, ගලේවෙල, මිල්ලවාන, තංගල්ල යන ප්‍රදේශවල පදිංචිකරුවන් බව ඒ සම්බන්ධ පරීක්ෂණ කරන වැලිකන්ද පොලීසිය සඳහන් කරයි.
පොල්හේන්ගොඩ යුද හමුදා කඳවුරේ විනයාරක්ෂක බළකා නිලධාරීන් පිරිසක් විසින් ලබාදුන් තොරතුරකට අනුව වැලිකන්ද පොලීසිය හා එම කඳවුරේ නිලධාරී කණ්ඩායමක් එක්ව මෙම සැකකරුවන් අත්අඩංගුවට ගෙන ඇත.
යුද හමුදාවේ බ්‍රිගේඩියර් නිල තනතුරක් දරමින් පෙනී සිටි පුද්ගලයා සතුව තිබූ යුද හමුදාවේ බ්‍රිගේඩියර් තනතුරට සමාන ඇඳුම් කට්ටල කීපයක් සහ ව්‍යාජ හැඳුනුම්පතක්ද මෙහි දී අත්අඩංගුවට ගත් බව පොලීසිය පවසයි.
පොලීසිය කරන ලද පරීක්ෂණවලට අනුව යුද හමුදාවේ බ්‍රිගේඩියර් නිල තනතුර දරන බවට පෙනී සිටි පුද්ගලයා යුද හමුදාවේ සිටි පුද්ගලයකු නොවන බව ද හෙළි වී තිබේ.
පොලොන්නරුව ජ්‍යෙෂ්ඨ පොලිස් අධිකාරී නිශාන් ද සිල්වා මහතාගේ උපදෙස් මත වැලිකන්ද වැඩ බලන පොලිස් ස්ථානාධිපති පොලිස් පරීක්ෂක ආර්.එම්.එස්.අයි. රාජපක්ෂ මහතා ඇතුළු පොලිස් නිලධාරි කණ්ඩායමක් මෙම වැටලීම සිදුකර සැකකරුවන් අත්අඩංගුවට ගනු ලැබූහ.
අත්අඩංගුවට ගත් සැකකරුවන් 24 වැනිදා පොලොන්නරුව මහේස්ත්‍රාත් අධිකරණයට ඉදිරිපත් කිරීමට කටයුතු කරන බව ඒ සම්බන්ධ පරීක්ෂණ සිදුකරන වැලිකන්ද පොලීසිය පවසයි.
අත්අඩංගුවට ගත් සැකකරුවන් පොළොන්නරුව මහේස්ත්‍රාත් අධිකරණයට ඉදිරිපත් කිරීමෙන් පසු යුදහමුදා සෙබළුන් දෙදෙනා සහ යුද හමුදාවේ ලෙස රගපෑ පුද්ගලයා ලබන 05 වැනිදා තෙක් රක්ෂිත බන්ධනාගාරගත කිරීමටත්, සෙසු සැකකරුවන් 08 දෙනා රුපියල් ලක්ෂ දෙක බැගින් වූ ශරීර ඇප මත මුදා හැරීමටත් පොළොන්නරුව මහේස්ත්‍රාත් එස්.අන්වර් සදාක් මහතා නියෝග කළේය.
