බෙංගාලබොක්කේ අවපීඩනය සුළි කුණාටුවක් දක්වා වර්ධනය වී ඇත. සුළඟේ වේගය පැයට කි.මී. 90ට වැඩිය. අහස වැහිබරය. අධික වර්ෂාව නිසා A/L විභාගය දින තුනකට අත්හිටුවා ඇත. කුඹුරු අක්කර දහස් ගණනක් ගංවතුරෙන් යටවී තිබේ. නිවාස කඩා වැටී ඇත. තත්ත්වය භයානකය. කෙසේ වුව කරුණු දෙකක් සතුටුදායකය. එනම්, වර්ෂාව හා සුළි කුණාටුව කෙමෙන් බැහැර යන්නට පටන්ගෙන ඇති බව හා සියලු කණ්ඩායම් අනාථවූවන්ට උපකාර කිරීම සඳහා පාරට බැස ඇති බව වාර්තා වීමය.
කාලගුණික විපර්යාස නිසා සමස්ත ලෝකයම අවුලට ගොස් තිබේ. මානව වර්ගයාගේ මෙන්ම සමස්ත ජීව පද්ධතියේම පැවැත්මට අභියෝගයක් ලෙස කාලගුණයේ රිද්මය වෙනස් වී ඇත. මෙහි කැපීපෙනෙන ලක්ෂණ කිහිපයක් සඳහන් කළ යුතුය.
(i) ජන ජීවිතයේ දෛනික කටයුතු අවුල් වී ඇත.
(ii) ආහාර නිෂ්පාදනයට බලවත් හානිවීම සිදුවීම හා ඉදිරියේදී ආහාර හිඟයක් ඇතිවීමට ඉඩ පෑදීම
(iii) ප්‍රවාහන, ගමනාගමන, සංචාරක කටයුතු අවුල්ය. ආදායම් මාර්ගවලට බාධා, ධීවර කටයුතු අඩපණ වෙයි.
(iv) විධිමත් අධ්‍යාපනයේ විභාග රටාවට බාධා, පාසල් පවත්වාගත නොහැකිවීම, අමතර පන්ති හා වෘත්තීය පුහුණු යන සියලු ක්ෂේත්‍ර අඩපණ වීම.
(v) නිෂ්පාදන කර්මාන්ත, අපනයන ක්ෂේත්‍රය, සංචාරක කර්මාන්තය අවුල් වෙයි. කලාකරුවන්ගේ ප්‍රසංග ජීවිතය නතර වී ඇත. ආදායම් නතර වී ඇත.
(vi) රාජ්‍ය ආදායම් පහළට යන අතර, ස්වාභාවික විපත් සඳහා වන්දි ගෙවීම ඇතුළු වෙනත් වියදම් දිගින් දිගටම ඉහළ යයි. මෙය රාජ්‍යයන්වල මූල්‍ය කටයුතු අවුල් කිරීමට සමත්වී ඇත.
(vii) ගොඩනැඟිලි කඩා වැටීම, යටිතල පහසුකම් බිඳවැටීම හා ඉදිකිරීම් ක්ෂේත්‍රයේ මන්දනයක් ද දැකගත හැකිය.
හැම අතින්ම දැකගත හැක්කේ රජයේ වියදම් අධික ලෙස ඉහළ යෑමක් හා ආදායම් බරපතළ ලෙස පහළට වැටීමකි. ආර්ථික අර්බුද පවතින රටවලට මෙය දරාගත නොහැකි තත්ත්වයක් වනු ඇත.
* පලස්තීනයේ නැතහොත් ගාසා තීරයේ සරණාගත කඳවුරුවලට වැසි ජලය එකතුවී තිබේ. එහි තාවකාලික කඳවුරු මිහිපිට අපායන් බවට පත්වී ඇත. කඳවුරුවල රෝගීන්ගේ තත්ත්වය අන්තිම නරකය. දරුවන් මෙන්ම කාන්තාවන් ද මුහුණදී ඇත්තේ බලවත් ඛේදවාචකයකටය. ඒ අතර නෙතන්යාහු එම කඳවුරුවලට ගුවනින් බෝම්බ ප්‍රහාර, ඩ්‍රෝන ප්‍රහාර හා මිසයිල් ප්‍රහාර එල්ල කරන අතර, ගොඩබිමින් කාලතුවක්කු ප්‍රහාරද එල්ල කරයි. මෙය බලවත් මානුෂික ඛේදවාචකයකි.
- බොලීවියාවේ ලාපාස් ප්‍රදේශය වැසි වතුරෙන් යටවී ඇත. ජන ජීවිතය මුළුමනින්ම අවුල්සහගතය. නිවාස විශාල ප්‍රමාණයක් විනාශවී ගොසිනි. ආර්ථික අතින් පසුබෑමකට ලක්වී සිටින බොලීවියාවට මේ තත්ත්වය දරාගත නොහැකිය.
- ලොව වැඩිම සරණාගතයන් පිරිසක් සිටින රට හැටියට සුඩානය සැලකේ. එම රටට එක්සත් ජාතීන්ගේ සංවිධානය යවන ආධාර අතරමඟදී කොල්ලකනු ලැබේ. සරණාගතයන්ගේ සංඛ්‍යාව මිලියන 25කි. රටේ මුළු ජනගහනය මිලියන 45ක් පමණය. ඉන් අඩක්ම බඩගින්නේ පසුවෙති. සුඩානයෙහි ඩාර්පූර් නගරය ඇතුළු ප්‍රදේශ රැසක මරාන්තික සාගතයක් පැතිරයාමට පටන්ගෙන තිබේ. දුප්පත්කමෙන් හා වියළි දේශගුණයෙන් විශේෂයෙන් නියඟයෙන් පීඩා විඳින සුඩානයටද වැසිවාර ගලාගියේය. කඳවුරු මුළුමනින්ම පාහේ බිමට සමතලා විය. දැන් එහි ඇත්තේ මරණය හා බඩගින්න පමණි.
ශ්‍රී ලංකාව දින කිහිපයක සිට මුහුණ දෙන්නේ ධාරානිපාත වර්ෂාවකටය. ඉදිරි දින කිහිපය තුළ ද දිස්ත්‍රික්ක කිහිපයකම මි.මී. 200කට අධික වැසි දෛනිකව ලැබෙන බව කාලගුණ විද්‍යා අනාවැකිවල සඳහන්ය. දිස්ත්‍රික්ක දහයක තත්ත්වය අතිශය නරක බව ප්‍රකාශ වී ඇත. ගාල්ල, මාතර, හම්බන්තොට, රත්නපුර, කෑගල්ල, නුවරඑළිය, අනුරාධපුරය, පොළොන්නරුව, පුත්තලම, මන්නාරම යනාදී ලෙස එම දිස්ත්‍රික්ක හඳුනාගත හැකිය. සිදුවී ඇති විනාශය තවම ගණනය කර නැති අතර, බැලූ බැල්මට පෙනෙන දේවල් කිහිපයක් ගැන කියන්නට පුළුවන.
(i) කුඹුරු අක්කර දහස් ගණනක් වැසි දියෙන්, ගංවතුරෙන් යටවී ඇත.
(ii) එළවළු, පලතුරු, සුළු අපනයන භෝග අලෙවි කරගත නොහැකිව විනාශයට යයි.
(iii) මේ වසරේ කෘෂිකර්මය මුළුමනින්ම පරාජිතය. ගොවියාට වන්දි ලබාදීම සඳහා විශාල මුදලක් යෙදවීමට සිදුවනු ඇත.
(iv) උසස් පෙළ විභාගය කල්දැමීමට සිදු වීම. ආහාර සුරක්ෂිතතාව සාර්ථක නැත.
(v) නිවාස විශාල ප්‍රමාණයකට හානි සිදුවී ඇත. තවම එය සිදු වෙමින් පවතී. නායයෑම් පස්කඳු කඩාවැටීම් අඛණ්ඩව සිදු වෙයි.
මෙවර කාලගුණ විපර්යාස වෙනදාට වඩා දරුණු බව දැනටම පෙනීගොස් තිබේ. වැස්ස නිසා අවතැන්වූ පිරිස ලක්ෂයකට ආසන්න වෙති. ඒ හැරෙන්නට මුළු රටේම දෛනික ජීවිතය අවුල්වී ඇත. මේ වන විටත් නැතහොත් අවතැන්වූවන්ගේ පොදු ස්ථාන තිස් ගණනක් පවත්වාගෙන යන බව වාර්තා වී ඇත. කුමක් වුව ජීවිත අනතුරු ගණන ඉතා අඩුය. එය සතුටට කාරණයකි. කාලගුණ විපර්යාසය පිළිබඳ නිල ප්‍රකාශ කිහිපයක් ඉදිරිපත් කිරීමට රජයට සම්බන්ධ ආයතන ක්‍රියා කර ඇත.
(i) අ.පො.ස. උ/පෙ. විභාගය දින තුනකට අත්හිටුවා ඇත. ඒ අනුව 27, 28, 29 දින තුනේ විභාගය පැවැත්වෙන්නේ නැත.
(ii) දිස්ත්‍රික්ක නවයකට පනවා ඇති නායයෑමේ අවදානම ඒ අයුරින්ම ඉදිරියටත් බලපැවැත්වේ.
(iii) දිවයිනේ ප්‍රධාන ජලාශ හැත්තෑ තුනක ජල ධාරිතාව 65%කට වඩා වැඩිවී ඇත. ඒ අනුව වාන් දොරටු විවෘත කිරීම වැඩිවනු ඇත.
(iv) ප්‍රදේශ ගණනාවකට මි.මී. 200ට අධික වැසි ඉදිරියටත් පවතිනු ඇත.
(v) මුහුදු යෑම මුළුමනින්ම අත්හිටුවීමට තීරණය කර තිබේ. මේ අනුව නැවත දැනුම් දෙනතුරු මුහුදු යෑම තහනම්ය.
(vi) ජලාශ කිහිපයක සියලුම වාන් දොරටු උපරිමයෙන් විවෘත කර ඇත. මෙලෙස ජලාශ තුළින් නිකුත්වන විශාල ජල ධාරිතාව ගැන ජනතාව සැලකිලිමත්ව පසුවිය යුතුය.
(vii) ඉදිරියේදී ආහාර ද්‍රව්‍යවල හිඟතාවක් ඇතිවිය හැකිය. වෙළෙඳපොළේ ගනුදෙනු බෙහෙවින් අවුල් විය හැකිය. මේ වන විටත් ආර්ථික මධ්‍යස්ථානවල ගනුදෙනු හරියාකාර ලෙස සිදුවන්නේ නැත.
(viii) රජයේ සැලසුම් ඉදිරිපත් කිරීම මෙන්ම අමාත්‍යාංශවල කටයුතු හා සංවර්ධනය ප්‍රමාද විය හැකිය.
(ix) නිෂ්පාදන කර්මාන්ත, සංචාරක හෝටල්වල තත්ත්වය දුර්වල විය හැකිය. එහි අර්ථය වන්නේ රාජ්‍ය ආදායම පහළ යෑමය.
පසුගියදා ස්පාඤ්ඤයේ ගංවතුරක් ඇති විය. ආපදාව ආරම්භ වූ දිනයේම සියදෙනෙක් මරණයට පත්වූහ. විශාල පිරිසක් අතුරුදන් වූහ. අමෙරිකාවේ ජෝර්ජියා ප්‍රාන්තයට බලපෑ චණ්ඩමාරුතයෙන් බරපතළ හානි සිදු විය. චීනයේ ප්‍රදේශ රැසක තවම ගංවතුර, ධාරානිපාත වැසි, නායයෑම් පවතී. මේ අතර කාලගුණ විපර්යාස පිළිබඳ ජගත් සමුළුව මේ දිනවලදී අසර්බයිජානයේ බාකු නුවරදී පැවැත්වෙයි. සමුළුව තවම අවසන් වී නැත. මෙවර සමුළුවේ ප්‍රධාන ඉලක්කය වී ඇත්තේ ආපදා සහිත රටවලට ලබාදිය හැකි ආධාර මුදල්වල ප්‍රමාණය වැඩිකර ගැනීමය. එය දුෂ්කරම කාරණයක් බවත්, බලවත් රටවල් ඊට එකඟ නොවන බවත් පෙනීගොස් තිබේ. අමෙරිකාව, චීනය, ඉන්දියාව වැනි බලවත් රටවල් සමුළුවට සහභාගි වී නැත. අවාසනාවන්ත තත්ත්වය වන්නේ කාලගුණික විපර්යාසයට අදාළ බලවත්ම මිනිස් ක්‍රියාකාරකම් සිදුවන්නේ ද චීනය, ඉන්දියාව, අමෙරිකාව වැනි රටවලින්ය.
යක්ෂයා තමන්ගේ නිවසට කඩාවැදී දරුවකු ගිලදමන තුරුම බලවතා යක්ෂයා ගැන බරපතළ ලෙස කල්පනා කරන්නේ නැත.
රන්ජන් අමරරත්න
