වසරකට වැඩි කාලයක් පුරා පැවැති ඊශ්‍රායල – හෙස්බුල්ලා යුද ගැටුම්වලට මඳ විරාමයක් තබමින් දෙපාර්ශ්වය අතර දින 60ක තාවකාලික සටන් විරාම ගිවිසුම පෙරේදා පස්වරුවේ සිට ක්‍රියාත්මක වූ බව විදෙස් මාධ්‍ය වාර්තා කළේය. එම සටන් විරාම ගිවිසුම පෙරේදා පස්වරුවේ ඊශ්‍රායලය, අමෙරිකාව සහ ප්‍රංශය විසින් නිවේදනය කරනු ලැබූ බව ද විදෙස් මාධ්‍ය වැඩිදුරටත් වාර්තා කළේය. ඉරාන හිතවාදී සංවිධානයක් වන හෙස්බුල්ලා සහ ඊශ්‍රායලය අතර පසුගිය මාස 14ක කාලයක් යුද ගැටුම් සිදුවූ අතර, ලෙබනනයේ සිවිල් වැසියන් විශාල සංඛ්‍යාවකට මරු කැඳවූ එම යුද ගැටුම් සටන් විරාමය ප්‍රකාශයට පත් කරනතුරු පැවති බවද විදෙස් මාධ්‍ය සඳහන් කළේය.
එම සටන් විරාම ගිවිසුමට අදාළ කොන්දේසියක් හෝ ඉන් කොටසක් හෙස්බුල්ලා සංවිධානය උල්ලංගනය කරන්නේ නම් එම මොහොතේදිම යළි ප්‍රහාර ඇරැඹීමට නොපැකිළෙන බව ඊශ්‍රායල අගමැති බෙන්ජමින් නෙතන්යාහු ප්‍රකාශ කර ඇතැයි ද වාර්තා වේ. දෙරටේම අවතැන්වූ ජනතාවට නිරුපද්‍රිතව සිය නිවාස කරා යෑමට අවශ්‍ය පසුබිම සැලසිම එම සටන් විරාම ගිවිසුමෙහි ප්‍රධාන කොන්දේසිය වන බව අමෙරිකාව සහ ප්‍රංශය ඒකාබද්ධ නිවේදනයක් නිකුත් කරමින් ප්‍රකාශ කර තිබේ.
