ජපානයේ පදිංචි මෙරට කාන්තාවක විසින් මහනුවර පොලීසියට කරන ලද පැමිණිල්ලකට අදාළ විමර්ශන කටයුතු කඩිනම් කර දීමට එම කාන්තාවගෙන් රුපියල් ලක්ෂ 2 1/2ක මුදලක් ඉල්ලූ බව කියන කොට්ඨාස අපරාධ විමර්ශන අංශයේ උප පොලිස් පරීක්ෂකවරයෙකු සම්බන්ධයෙන් පොලීසිය විමර්ශනයක් ආරම්භ කර තිබේ.
අදාළ කාන්තාව විසින් වැඩබලන පොලිස්පතිවරයාට ජපානයේ සිට යොමු කරන ලද ලිඛිත පැමිණිල්ලකට අනුව මෙම විමර්ශනය ආරම්භ කර ඇත.
උප පොලිස් පරීක්ෂකවරයා විසින් ඉල්ලූ බව කියන රුපියල් ලක්ෂ 2 1/2ක මුදලින් අත්තිකාරමක් ලෙස කාන්තාව විසින් රුපියල් 50000ක මුදලක් ලබා දී තිබෙන අතර එම මුදල් තැන්පත් කළ ගිණුම් අංකය ද ඇය විසින් පැමිණිල්ල සමඟ වැඩ බලන පොලිස්පතිවරයාට යොමුකර තිබේ.
අදාළ කාන්තාව විසින් ලිපියේ පිටපත් අල්ලස් හෝ දූෂණ විමර්ශන කොමිෂන් සභාවේ කොමසාරිස්වරයාටත් මධ්‍යම පළාත් ජ්‍යෙෂ්ඨ නියෝජ්‍ය පොලිස්පති හා නියෝජ්‍ය පොලිස්පතිවරයා වෙතත් යොමු කරනු ලැබ ඇත.
පැමිණිල්ල කළ කාන්තාවගේ සැමියා බහු විවාහරයක් සිදුකර ගැනීමේ සිද්ධියකට අදාළ පැමිණිල්ල 2022 අගෝස්තු මස 16 දින සිදුකර තිබෙන බව ඇය විසින් පොලිස්පතිවරයාට යොමුකළ ලිපියේ සඳහන් කරනු ලැබ තිබේ.
පැමිණිල්ලට අදාළ විමර්ශන උප පොලිස් පරීක්ෂකවරයා අතරමඟ නරත කර තිබිය දී තමන් අදාළ ඒකකයේ ස්ථානාධිපතිවරයාට ඍජුව දුරකතනයෙන් කතාකර සිද්ධිය දැනුම් දුන් බවත් එම අවස්ථාවේ ස්ථානාධිපතිවරයා මැදිහත්ව සාධාරණය ඉටු කළ බවත් ඇය වැඩි දුරටත් පැමිණිල්ලේ දක්වා ඇත.
