සිය බිරියට එරෙහිව සැමියකු විසින් කළ පැමිණිල්ලක් දෙපාර්ශ්වය කැඳවා පෙරේදා (26) විභාග කිරීමට සූදානම් වූ අවස්ථාවේදී මාවනැල්ල පොලීසියේදී සැමියා විසින් බිරියගේ ගෙල සහ කට තියුණු ආයුධයකින් කපා තුවාල කර ඇත.
සැමියා විසින් සඟවාගෙන ආ පේපර් කටරයකින් සිදු කළ එම පහරදීමෙන් කැපුම් තුවාල ලැබූ 21 හැවිරිදි බිරිය මාවනැල්ල රෝහලට ඇතුළත් කිරීමට පොලීසිය පියවර ගෙන 39 හැවිරිදි සැමියාව අත්අඩංගුවට ගෙන තිබේ.
මෙසේ තුවාල ලබා ඇත්තේ මාවනැල්ලේ පදිංචි එක් දරු මවකි.
මෙම තරුණ බිරියව සැමියා විසින් බාහිර පාර්ශ්වයන්ට කාලයක සිට මුදලට අලෙවිකර ඇති බව ද මෙහි දී පොලීසියට අනාවරණය වී තිබේ.
පසුගිය 24 වැනි දින දෙදෙනා අතර මේ හා සම්බන්ධ ගැටලුවක් මුල්කරගෙන බහින් බස් වීමක් සිදු වීමෙන් අනතුරුව ඒ සම්බන්ධයෙන් පොලීසියට පැමිණිල්ලක් ලැබී තිබී ඇත.
මෙයට පෙරද බිරිය විසින් සැමියාට එරෙහිව පැමිණිල්ලක් කර තිබුණු බවත් ඒ සම්බන්ධයෙන් විමර්ශනයක් පවා සිදුකර ඇති බවත් පොලීසිය සඳහන් කළේය.
සැමියා විසින් බිරියගේ නිරුවත් ඡායාරූප ජංගම දුරකථනයේ තබාගෙන බිරියව බිය ගන්වමින් විවිධ පුද්ගලයන්ට අලෙවිකර ඇති බවද පොලීසියට තොරතුරු ලැබී තිබේ. ඒ ගැන විමර්ශනයක් පවා සිදුවූ බව උසස් පොලිස් නිලධාරියෙක් සඳහන් කළේය.
සැමියා සිය බිරියට එරෙහිව මාවනැල්ල පොලීසියට කළ පැමිණිල්ලට අනුව දෙදෙනාම පොලීසිය වෙත ගෙන්වා ඇත්තේ පැමිණිල්ල විභාග කිරීමටය. එම අවස්ථාවේ කඩදාසි කපන කටර් තලයක් හොර රහසේ සඟවා පොලීසියට පැමිණි සැමියා විසින් බිරියගේ මුඛ ප්‍රදේශයේ සහ ගෙල ප්‍රදේශයේ කැපුම් තුවාල කිහිපයක් සිදු කර තිබේ.
මාවනැල්ල පොලීසිය මේ සම්බන්ධයෙන් වැඩිදුර පරීක්ෂණ සිදු කරයි.
