උපන්දින සාදයකට පැමිණ අධික ලෙස මත්පැන් පානය කර වේයන්ගොඩ නයිවල ප්‍රදේශයේ හෝටලයක දී කලහකාරී ලෙස හැසිරුණු බව කියන සැකකරුවන් දස දෙනෙකුට අත්තනගල්ල අංක 02 මහේස්ත්‍රාත් මංජුල කරුණාරත්න මහතා පෙරේදා (26) පස්වරුවේ එක් අයෙකුට රුපියල් ලක්ෂ පහ බැගින් දස දෙනාට කොන්දේසි සහිත රුපියල් ලක්ෂ පනහක ශරීර ඇප නියම කළේය.
දොම්පේ හා යක්කල ඇතුළු ප්‍රදේශ කිහිපයක පදිංචි සැකකරුවන් දස දෙනෙකු එසේ රිමාන්ඩ් කෙරිණි.
රුපියල් ලක්ෂ පහක ශරීර ඇපවලට එක් අයෙකුට පුද්ගලයින් දෙදෙනා බැගින් දස දෙනාට පුද්ගලයින් විසි දෙනෙකු අත්සන් කළ යුතු බවටද නියෝග කෙරිණි.
වේයන්ගොඩ නයිවල ප්‍රදේශයේ හෝටලයකට උපන්දින සාදයක් සඳහා පැමිණ සාදය පවත්වා රාත්‍රී 11.00 ද පසුවීමෙන් පසුවත් මත්පැන් ලබාදෙන ලෙසට කර ඇති ඉල්ලීමක් හෝටල් බලධාරින් විසින් ප්‍රතික්ෂේප කිරීමෙන් අනතුරුව හෝටලය තුළ කලහකාරී ලෙස හැසිරුණු බවට ලද පැමිණිල්ලකට අනුව වේයන්ගොඩ පොලීසිය සී.සී.ටී.වී. දර්ශන ඔස්සේ පරීක්ෂණ පවත්වා සැකකරුවන් දස දෙනා අත්අඩංගුවට ගෙන තිබිණ.
වේයන්ගොඩ පොලීසියේ පොලිස් පරීක්ෂක සුනිල් ප්‍රේමරත්න මහතා කරුණු දක්වමින් මොවුන් දස දෙනා ඇතුළු පිරිසක් උපන්දින සාදයක් සඳහා කලින් වෙන් කරවාගත් පරිදි හෝටලයට පැමිණ කා බී රාත්‍රී එකොළහ ද පසුවීමෙන් අනතුරුව මත්පැන් ලබාදෙන ලෙසට කර ඇති ඉල්ලීමක් හෝටල් බලධාරින් විසින් ප්‍රතික්ෂේප කිරීම හේතුවෙන් කලහකාරී ලෙස හැසිරී ඇති බවට පරීක්ෂණවලදී හෙළි වී ඇති බව පවසා සිටියේය.
මොවුන් දස දෙනා අතර එක් පුද්ගලයෙකු භාරයේ බලපත්‍ර සහිත පිස්තෝල අවියක් හා තවත් පුද්ගලයෙකු භාරයේ සෙල්ලම් පිස්තෝලයක් ද තිබී පොලීසිය භාරයට ගෙන ඇති බවත් පොලිස් පරීක්ෂකවරයා පවසා සිටියේය.
මෙහිදී අනර්ථයක් සිදු කර නොමැති බවට පොලීසිය කරන ලද කරුණු දැක්වීම්වලින් අනාවරණය වීම ද සලකා බලා මහේස්ත්‍රාත්වරයා එසේ සැකකරුවන් හට ඇප නියම කළේය.
මෙම නඩුව නැවත කැඳවීම 2025.06.05 වනදාට කල් තැබිණ.
වේයන්ගොඩ පොලීසියේ පොලිස් පරීක්ෂක සුනිල් ප්‍රේමරත්න මහතා පැමිණිල්ල මෙහෙයවිය.
