කිතුල් ගසක බැද තිබූ බඹර කූඩුවකට උකුස්සකු පහරදීමෙන් කූඩුව ඇවිස්සීමෙන් පසු බඹර ප්‍රහාරයට ලක්ව පුද්ගලයන් 18 දෙනකු තුවාල ලබා ඇති පුවතක් බුලත්සිංහල ඉහළ වෙල්ගම ගම්මානයෙන් වාර්තාවේ.
ප්‍රහාරයට ලක්වූ අටදෙනකු අගලවත්ත පිඹුර ප්‍රාදේශීය රෝහලට ඇතුළත් කර ඇති බව රෝහල් ප්‍රකාශකයෙක් පැවසීය. ප්‍රහාරයට ලක්වූ තවත් දසදෙනකු පමණ දේශීය වෙදකම් කරමින් සිටින බව ගම්වාසීහු පවසති. සිද්ධිය සම්බන්ධයෙන් බුලත්සිංහල ප්‍රාදේශීය ලේකම් කාර්යාලය සහ සෞඛ්‍ය අංශ දැනුම්වත් කර ඇති බව ගම්වාසීහු වැඩිදුරටත් පැවසූහ. පිඹුර රෝහලට ප්‍රතිකාර සඳහා ඇතුළුවූ දෙදෙනකු පිටව ගොස් ඇති බවත්, කාන්තාවන් තිදෙනකු සහ පිරිමි පුද්ගලයන් තිදෙනකු ප්‍රතිකාර ලබමින් සිටින බවත් රෝහල් ප්‍රකාශකයකු සඳහන් කළ අතර ඔවුන්ගේ තත්ත්වය එතරම් බරපතළ නොවන බවද රෝහල් ප්‍රකාශකයා වැඩිදුරටත් සඳහන් කළේය.
