බැංකුවල ඒ.ටී.එම්. යන්ත්‍රවලට තැන්පත් කිරීමට රැගෙන යමින් තිබුණු රුපියල් කෝටි හතහමාරක මුදලක් මිනුවන්ගොඩදී සොරාගෙන පලා ගිය රියැදුරාත් ඒ සඳහා ඔහුට සහාය දුන් මිතුරාත් විශේෂ පොලිස් කණ්ඩායමක් විසින් අත්අඩංගුවට ගෙන ඇත.
එම අවස්ථාවේදී ඔවුන් දෙදෙනා සතුව තිබී සොරාගන්නා ලද මුදලින් රුපියල් ලක්ෂ 40කට ආසන්න මුදලක් සොයාගෙන තිබුණි.
පොලිස් මාධ්‍ය ප්‍රකාශක නියෝජ්‍ය පොලිස්පති නීතිඥ නිහාල් තල්දූව මහතා සඳහන් කරනු ලැබුවේ මෙම සැකකරුවන් දෙදෙනා ඊයේ (27) සවස මිනුවන්ගොඩ යටියනදී අත්අඩංගුවට ගත් බවට ගම්පහ කොට්ඨාස අපරාධ විමර්ශන කාර්යාංශයෙන් තමාව දැනුම්වත් කළ බවත් ය. සැකකරුවන් සතුව තිබී රුපියල් ලක්ෂ 40කට ආසන්න මුදලක් සොයාගත් බව සඳහන් කළ බවත්, සැකකරුවන් දෙදෙනා කතරගම ගොස් මිනුවන්ගොඩට පැමිණ සැඟවී සිටියදී අත්අඩංගුවට ගත් බවත් එම නිලධාරීන් පැවසූ බව මාධ්‍ය ප්‍රකාශකවරයා වැඩිදුරටත් සඳහන් කළේය.
ගම්පහ පොලිස් ප්‍රධානියකුගෙන් මේ ගැන විමසීමේදී ඔහු පැවසුවේ සෙවණගලින් අත්අඩංගුවට ගනු ලැබුවේ අදාළ සැකකරුවන් දෙදෙනා නොවන බවය. එසේ නම් අත්අඩංගුවට ගත් එම සැකකරුවන් දෙදෙනාට කුමක් සිදුවූයේ දැයි කළ විමසුමේදී එම උසස් නිලධාරියා සඳහන් කරනු ලැබුවේ වැඩක් නොමැති බැවින් එම සැකකරුවන් දෙදෙනා මුදා හැරිය බවය. රුපියල් කෝටි හතහමාරක පමණ මුදලක් මෙම සැකකරුවන් දෙදෙනා සොරාගෙන ගොස් තිබුණද මෙතෙක් සොයාගැනීමට පොලීසියට හැකියාව ලැබී ඇත්තේ රුපියල් කෝටි 04කට ආසන්න මුදලක් පමණි. එම මුදලින් රුපියල් කෝටි තුනහමාරකට ආසන්න මුදලක් සොයාගනු ලැබුවේ සොරකම සිදුව පැය 24ක් ගතවන්නටත් මත්තෙන් සැකකරුවෙක් අත්අඩංගුවට ගනිමිනි. එම මුදල් එම සැකකරුගේ නි‍ෙවසේ වැඩි පරිස්සමට සඟවා තිබී ඇත. අනතුරුව දිගින් දිගටම ප්‍රධාන සැකකරුවන් දෙදෙනාගේ ඡායාරූප මාධ්‍ය මඟින් පොලීසිය ප්‍රසිද්ධ කරමින් ඔවුන් දෙදෙනා අත්අඩංගුවට ගැනීමට මහජන සහාය පැතූහ. ඒ අතරතුර ඔවුන් යාපනයේ සැරිසරන බවට තොරතුරු පොලීසිය සොයාගත් අතර ඉන්දියාවට පළා යාමට සූදානම් වූ බව කියැවිනි. ඒ වෙනුවෙන් රුපියල් ලක්ෂ 25ක් වැයකර ඇතත් එය ව්‍යර්ථ වී ඇති බව ද පැවසේ.
රුපියල් කෝටි හතහමාරක මුදල් සොරකම සිදුවන්නේ පසුගිය 18 වෙනිදා වන අතර සොරාගත් මුදලින් අඩකට ආසන්න මුදලක් සොයාගැනීමට තවත් ඉතිරිව ඇත.
