වීසා නැතිව වැලිමඩ ගුරුතලාව පූනාවල අලුගොල්ල ප්‍රදේශයේ නිවෙසක සැඟව සිටි ඉන්දීය ජාතිකයකු ඊයේ (4) අත්අඩංගුවට ගත් බව බෝගහකුඹුර පොලීසිය පවසයි.
මෙසේ අත්අඩංගුවට ගෙන ඇත්තේ ගුරුතලාව පූනාවල අලුගොල්ල ප්‍රදේශයේ කුලී නිවෙසක රැඳී සිටි තමිල්නාඩු තෙරුනල්වෙලි කාලිංග පට්ටි වේදමුත්තුනගර් ප්‍රදේශයේ පදිංචි 29 හැවිරිදි ඉන්දියානු ජාතිකයකු බව පොලීසිය කියයි.
මොහු විදේශ රැකියාවක නිරතව සිටියදී වැලිමඩ ගුරුතලාව ප්‍රදේශයේ පදිංචි කාන්තාවක දැන හඳුනාගෙන ප්‍රේම සබඳතාවක් පවත්වාගෙන ගොස් ඇති බවට කරුණු හෙළි වූ බව පොලීසිය සඳහන් කළේය. පසුව මොහු 2023 වසරේ දෙසැම්බර් 11 දින ශ්‍රී ලංකාවට පැමිණ මේ කාන්තාව සමඟ වැලිමඩ ගුරුතලාව පූනාවල අලුගොල්ල ප්‍රදේශයේ තාවකාලික කුලී නිවෙසක නතර වී සිටියදී ලද තොරතුරක් මත වීසා නැතිව හොර රහසේ මෙරට සැඟවී සිටි සැකකරු අත්අඩංගුවට ගත් බවද පොලීසිය පැවසීය.
බණ්ඩාරවෙල ජ්‍යෙෂ්ඨ පොලිස් අධිකාරි ප්‍රදීප් කළුපහන, පොලිස් අධිකාරි ඩී.බී.එච්. කලණසිරි සහකාර පොලිස් අධිකාරි ප්‍රදීප් කුමාර යන මහත්වරුන්ගේ උපදෙස් මත බෝගහකුඹුර පොලිස් ස්ථානාධිපති ප්‍රධාන පොලිස් පරික්ෂක ඩී.ආර්.එන්.ආර්. බණ්ඩාර මහතා ඇතුළු නිලධාරීහු වැඩිදුර පරීක්ෂණ පවත්වති.
