රුපියල් කෝටි හතරකට වැඩි වෙළෙඳපොළ වටිනාකමකින් යුතු හෙරොයින් හා අයිස් මත් ද්‍රව්‍ය ළඟ තබා ගෙන සිටි බව කියන සැකකාර ජෝඩුවක් මේ මස 16 වැනිදා දක්වා රිමාන්ඩ් භාරයේ රඳවා තැබීමට අත්තනගල්ල අංක 02 මහේස්ත්‍රාත් මංජුල කරුණාරත්න මහතා පෙරේදා (03) පස්වරුවේ නියෝග කළේය.
බී.පී. චිරාන් දුෂාන්ත හා අශෝකා ලක්මාලි යන සැකකරු හා සැකකාරිය එසේ රිමාන්ඩ් කෙරිණි. ලද තොරතුරකට අනුව පොලිස් මත්ද්‍රව්‍ය නාශක කාර්යාංශයේ පොලිස් නිලධාරීන් පිරිසක් නිට්ටඹුව, කත්තොට ප්‍රදේශයේ නි‍ෙවසක් සෝදිසි කර හෙරොයින් කිලෝ එකයි ග්‍රෑම් 50ක් හා අයිස් මත්ද්‍රව්‍ය ග්‍රෑම් 432ක් සමඟ සැකකාර ජෝඩුව අත්අඩංගුවට ගෙන තිබිණ. මොවුන් දෙදෙනා අධිකරණ නියෝගයකට අනුව දින පහක කාලයක් පොලිස් මත්ද්‍රව්‍ය නාශක කාර්යාංශය තුළ රඳවාගෙන වැඩිදුර පරීක්ෂණ පවත්වා ඒ පිළිබඳ වාර්තාව සමඟ අධිකරණයට ඉදිරිපත් කළ අවස්ථාවේ එසේ රිමාන්ඩ් කෙරිණි. මෙහිදී පොලීසිය කරන ලද ඉල්ලීමක් සලකා බැලූ මහේස්ත්‍රාත්වරයා ඔවුන් සතුව තිබූ ජංගම දුරකතන පිළිබඳව දුරකතන විශ්ලේෂණ වාර්තාවක් කැඳවීමට ද නියෝග කළේය.
මොවුන් දෙදෙනා අවිවාහක ජෝඩුවක් බවත් විවෘත අධිකරණයේදී අනාවරණය කෙරිණි. මෙම නඩුව නැවත කැඳවීම මේ මස 16 වැනිදා කල් තැබිණ. පොලිස් මත්ද්‍රව්‍ය නාශක කාර්යාංශයේ පොලිස් නිලධාරීහු දෙදෙනෙක් පැමිණිල්ල මෙහෙය වූහ.
