ගාල්ල නගරයේ පවතින රථවාහන තදබදය අවම කිරීමට සහ පදිකයන්ගේ ආරක්ෂාව සඳහා ප්‍රධාන බස් නැවතුම්පොළේ සිට සමනල පාලම දෙසට උමං මාර්ගයක් ඉදිකිරීමට පියවර ගන්නා ලෙස මුහුදුබඩ දුම්රිය මගී සමිතිය රජයට යෝජනාවක් ඉදිරිපත් කරමින් ඉල්ලා සිටියි.
එම දුම්රිය මගී සමිතියේ සභාපති ගාල්ලේ ගුණපාල විතාරණ මහතා යෝජනාවේ පිටපත් ප්‍රවාහන ඇමැතිවරයාට, මාර්ග සංවර්ධන අධිකාරියට, ගාල්ල මහ නගර සභාවට සහ පොලිස් අධිකාරිවරයාට යවමින් පෙන්වා දී ඇත්තේ බස් නැවතුම්පොළ ඉදිරිපිට ගාල්ල -මාතර මහාමාර්ගයේ මීටර් සියයක පමණ කෙටි දුර තුළ පදික මාරුවීම් තුනක් සහ වටරවුම් දෙකක් ඇති නිසා නිතරම අනවශ්‍ය වාහන තදබදයක් පවතින බවයි.
එමනිසා පදික මාරුවීම්වලින් මාරුවීමට බලා සිටිනවාට වඩා උමං මාර්ගයක් ඉදිකරන්නේ නම් පදිකයන්ට ආරක්ෂා සහිතව පාර හරහා ගමන් කළ හැකි බවද එම යෝජනාව මඟින් වැඩිදුරටත් පෙන්වා දී ඇත.
