ගල්කිස්ස පොලිස් වසමේ සිරිපාල මාවතේ දී බඩෝවිට පදිංචි 24 හැවිරිදි තරුණයකුට ඊයේ (19) වෙඩි තබා ඝාතනය කර යතුරුපැදියකින් පලායමින් සිටි වෙඩික්කරු ගිනි අවිය ද සමඟ අත්අඩංගුවට ගැනීමට පොලීසිය සමත්ව ඇත.
මෙම වෙඩික්කරු කොටුකරගෙන ඇත්තේ මහජන ආරක්ෂක අමාත්‍යාංශයේ ලේකම් විශ්‍රාමික ජ්‍යෙෂ්ඨ නියෝජ්‍ය පොලිස්පති රවී සෙනෙවිරත්න මහතාගේ ආරක්ෂාව සම්බන්ධයෙන් ඔහු පදිංචි නිවෙස අවට ආවේක්ෂණ රාජකාරියේ නිරතව සිටි පොලිස් නිලධාරියෙකි. වෙඩික්කරු අත්අඩංගුවට ගැනීමට යාමේදී එම පොලිස් නිලධාරියාට ඔහු වෙඩි තැබීමට සූදානම් වී ඇති බවත් ගිනි අවිය ක්‍රියාත්මක නොවී බිම වැටීම හේතුවෙන් අනතුරක් වී නැති බවත් පොලිස් තොරතුරු අනාවරණය කළේය. වෙඩික්කරු 47 හැවිරිදි වියේ පසුවන පොල්ගස්ඕවිට පන්සල්වත්තේ පදිංචි ශ්‍රීනාත් ප්‍රනාන්දු නමැත්තෙකි.
පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි නීතිවේදී බුද්ධික මනතුංග මහතා සඳහන් කරනු ලැබුවේ මනුෂ්‍ය ඝාතනයක් සම්බන්ධයෙන් මෙයට පෙර ද ඔහුට එරෙහිව චෝදනා ඇති බවය. ඒ හැරුණුකොට මත්කුඩු ජාවාරම සම්බන්ධයෙන් ද අවස්ථා කිහිපයකදීම පොලීසියට ඔහු හසුවී ඇති බව විමර්ශනවලින් අනාවරණය වී තිබේ. මෙම වෙඩි තැබීමට මුල දෙහිවල, ගල්කිස්ස හා කොහුවල ආශ්‍රිතව මත්කුඩු ජාවාරම සම්බන්ධයෙන් “කොස්මල්ලී” නමැති මත්කුඩු ජාවාරම්කරුත් “අසංක” නමැති මත්කුඩු ජාවාරම්කරුත් අතර ඇති ගැටුමක් බව පොලීසිය සඳහන් කරයි. මෙම අපරාධකරුවන් දෙදෙනාම විදේශගතව සිටිමින් සිය ගෝලබාලයන් යොදා වෙඩි තැබීම් සහ ඝාතන කරන බව විමර්ශනවලින් අනාවරණය වී තිබේ.
සිරිපාල මාවතේදී ඊයේ සිදුවූ වෙඩි තැබීමෙන් මියගොස් ඇත්තේ බඩෝවිට පදිංචි සවිදු තරුෂ නමැති 24 හැවිරිදි වියේ තරුණයෙකි. වෙඩි තබා ඇත්තේ අසංකගේ පාර්ශවයෙන් බව විමර්ශනවලින් පෙනී ගොස් ඇතැයි උසස් පොලිස් නිලධාරියකු පැවසීය.
යතුරු පැදියකින් පැමිණි වෙඩික්කරු සිරිපාල මාවතේදී වෙඩි තබා පලායමින් සිට ඇත්තේ අතුරු මාර්ගයක් ඔස්සේය. දෙහිවල පොලිස් ස්ථානයේ සේවයේ නිරත පොලිස් පරීක්ෂකවරයකු සහ කොස්තාපල්වරු තිදෙනකු පොලිස් ත්‍රීරෝද රථයෙන් වරෙන්තුකරුවකු අල්ලාගෙන එම අතුරු මාර්ගයේ ගමන් කරමින් සිට තිබේ. එම අවස්ථාවේදී මාර්ගයේ යම් වාහන තදබදයක් තිබී ඇති බවත් වෙඩික්කරු ගමන් කළ යතුරුපැදිය, පොලිස් ත්‍රීරෝද රථයට වෙට්ටුවක් දමා ඉදිරියට ධාවනය කරන අවස්ථාවේදී ත්‍රීරෝද රථයේ සිටි පොලිස් රියැදුරා යතුරුපැදිකරුට කෑගසා ඇති බවත් පොලිස් තොරතුරු සඳහන් කළේය. එම අවස්ථාවේදී යතුරුපැදියේ පසුපැදිකරු පොලිස් නිලධාරීන් දෙසට හැරී අසභ්‍ය වචනයක් කියා ඇති බව සඳහන්ය.
මහජන ආරක්ෂක අමාත්‍යාංශයේ ලේකම්වරයාගේ නිවෙස පිහිටි ප්‍රදේශයේ ආවේක්ෂණ රාජකාරිවල නිරතව සිටින සිවිල් ඇඳුමින් සිටි පොලිස් නිලධාරියා සිය පෞද්ගලික යතුරුපැදියෙන් එම ස්ථානයෙන් ඒ වන විට ගමන් කරමින් සිට ඇත. යතුරුපැදිකරුවකු පොලිස් නිලධාරීන්ට අසභ්‍ය වචනයක් කියමින් බැණ වදිමින් ගමන් කරන අයුරු නිරීක්ෂණය වූ එම නිලධාරියා එම යතුරුපැදිය පස්සේ පන්නා ගොස් සිය යතුරුපැදියෙන් මග හරස් කර තිබේ. එහිදී යතුරුපැදියේ පසුපැදිකරු බිමට බැස ගිනි අවියක් අතට ගෙන එය පොලිස් නිලධාරියා දෙසට එල්ල කර ඇති බවත් එහිදී ගිනි අවිය ක්‍රියාත්මක නොවී බිම වැටී ඇති බවත් පොලිස් තොරතුරු සඳහන් කළේය. ඒත් එක්කම ත්‍රිරෝද රථයේ සිටි නිලධාරීන්ටද එම ස්ථානයට පැමිණ ගිනි අවිය දිගුකළ පුද්ගලයාගේ ඇඟට පැන බදාගෙන ඇති බවත් ඒ අවස්ථාවේදී යතුරුපැදිකරු පලාගොස් ඇති බවත් පොලිස් තොරතුරු අනාවරණය කළේය.
අත්අඩංගුවට ගත් සැකකරුගෙන් කළ ප්‍රශ්න කිරීමේ දී හෙළිවී ඇත්තේ සිරිපාල මාවතේ වෙඩික්කරු ඔහු බවත් ගිනි අවිය එම වෙඩි තැබීමට යොදාගත් එක බවත්ය. අත්අඩංගුවට ගත් සැකකරු වැඩිදුර විමර්ශන සඳහා ගල්කිස්ස කොට්ඨාස අපරාධ විමර්ශන කාර්යාංශයට භාරදී තිබේ. යතුරුපැදිකරු මෙන්ම මෙම ඝාතන සැලසුම පිටුපස සිටින සැකකරුවන් අත්අඩංගුවට ගැනීමට ඊයේ මෙහෙයුමක් අරඹා තිබුණි.
