දිවයිනේ විවිධ ප්‍රදේශවල ලැගුම්හල්වල නවාතැන් ගනිමින් රාත්‍රී කාලයේ සූක්ෂ්ම ලෙස නිවෙස්වලට ඇතුළු වී ව්‍යාජ පිස්තෝල පෙන්වා බිය ගන්වමින් කොල්ලකන ලද රුපියල් කෝටි පහකට අධික රන් භාණ්ඩ ඇතුළු වටිනා භාණ්ඩ රැසක් සමඟ කාන්තාවක් විසින් මෙහෙයවන ලද කොල්ල කල්ලියක් අත්අඩංගුවට ගැනීමට වෙන්නප්පුව පොලීසිය සමත්ව ඇත.
වෙන්නප්පුව පොලිස් වසමට අයත් නිවාස රැසක කොල්ලකෑම් සම්බන්ධව පොලීසියට සිදු කළ පැමිණිලි සැලකිල්ලට ගෙන සිදු කළ දීර්ඝ විමර්ශනයකින් පසු මෙම පිරිස අත්අඩංගුවට ගැනීම සිදුකර ඇත.
වයස අවුරුදු 36 ක් වූ ප්‍රධාන සැකකාර කාන්තාව, වයස අවුරුදු 22ක් වූ ඇයගේ සැමියා, කාන්තාවගේ සහෝදරයන් දෙදෙනෙක් හා සැමියාගේ මිතුරකු ඇතුළු පස් දෙනෙක් මෙසේ අත්අඩංගුවට ගෙන තිබේ.
අත්අඩංගුවට පත් යුවළ හා සැකකරුවන් මතුගම ප්‍රදේශයේ පදිංචි අය වෙති.
රන් මාල, මුදු, කරාඹු, වළලු ඇතුළු පවුම් විසි පහකට අධික රන් භාණ්ඩ, වටිනා ලැප්ටොප්, අත් ඔරලෝසු, ජංගම දුරකතන , මුදල් ඇතුළු වටිනා භාණ්ඩ රැසක් මෙසේ සොරාගෙන ඇති භාණ්ඩ අතර වේ.
කොල්ලකන ලද රන් ආභරණ විශාල ප්‍රමාණයක් උකස් මධ්‍යස්ථානවලට උකස් කර තිබේ. කොල්ල කල්ලියේ ප්‍රධාන සැකකාරියගේ සැමියා අධික ලෙස මත්කුඩුවලට ඇබ්බැහි වී ඇති බවත්, ඔහුට දිනකට මත්ද්‍රව්‍ය සඳහා රුපියල් 30,000 – 40,000 ත් අතර මුදලක් වැය වන බව ද පොලිස් පරීක්ෂණවලින් අනාවරණය වී තිබේ.
මෙසේ නිවෙස්වලින් කොල්ලකන ලද මුදල් විශාල ප්‍රමාණයක් මත්කුඩු භාවිතය සඳහා ඔහු යොදාගෙන ඇති බව මූලික පොලිස් පරීක්ෂණවලින් හෙළිවී තිබේ. එම සැකකරුට එරෙහිව අධිකරණයෙන් නඩු දහතුනක් සඳහා වරෙන්තු නිකුත් කර ඇති බව ද පොලීසිය පවසයි.
වෙන්නප්පුව පොලිස් වසමට අයත් වයික්කාල ප්‍රදේශයේ නීතිඥවරයකු හා ඇයගේ මව ජීවත්වන නිවෙසට මෙම සොර කණ්ඩායම ඇතුළු වී ව්‍යාජ පිස්තෝල පෙන්වා ඔවුන්ගේ දෑත් බැඳ රුපියල් ලක්ෂ එකොළහකට අධික රන් භාණ්ඩ හා වටිනා භාණ්ඩ සොරා ගැනීම, මාරවිල පොලිස් වසමේ නිවෙස් හතරකින් රුපියල් ලක්ෂ හතළිහකට අධික රන් භාණ්ඩ ඇතුළු වටිනා භාණ්ඩ රැසක් සොරා ගැනීම ඇතුළු පුත්තලම සිට මාතර දක්වා ප්‍රදේශ රැසක නිවෙස් විසි පහක් බිඳ කොල්ලකෑම් සිදු කර ඇති බවද පොලීසිය විසින් සිදු කරන ලද විමර්ශනවලදී අනාවරණය වී ඇත.
මාරවිල පොලිස් වසමට අයත් ලැගුම්හලක ඔවුන් ලැගුම් ගෙන සිටි බවට අනාවරණය වීමෙන් පසු එම ලැගුම්හලෙන් ලබාගත් ලිපිනයන් ඔස්සේ සිදු කළ දීර්ඝ විමර්ශනවලින් අනතුරුව මෙම කොල්ල කල්ලිය අත්අඩංගුවට ගැනීමට හැකිවී ඇත.
