එළඹෙන නිදහස් දා මහජන ප්‍රදර්ශනයට එක් කරන රිදියගම සෆාරි උද්‍යානයේ අලුත උපන් සිංහ පැටවුන් 06 දෙනාට නම් තැබීමට මහජනතාවට අවස්ථාවක් උදාවී ඇත. මීට මාස තුනකට පෙර හම්බන්තොට, රිදියගම සෆාරි උද්‍යානයේදී උපත ලද සිංහ පැටවුන් හයදෙනා එළඹෙන නිදහස් දිනය දා මහජන ප්‍රදර්ශනයට එක් කරන අතර, ඊට ප්‍රථම මේ පැටවුන් 06 දෙනාට නම් තැබීමට බලාපොරොත්තු වන බවත් ඒ සඳහා ජනතාවට අවස්ථාව ලබාදීමට තීරණය කළ බවත් රිදියගම සෆාරි උද්‍යානයේ සහකාර අධ්‍යක්ෂ හේමන්ත සමරසේකර මහතා පැවසීය.
හම්බන්තොට රිදියගම සෆාරි උද්‍යානයේ සිටින “ඩෝරා” නමැති සිංහ ධේනුවටත් ඩෝරාගේ මව වන “ලාරා” නමැති සිංහ ධේනුවටත් දාව උපන් සිංහ පැටවුන් හය දෙනාට මෙලෙස නම් තැබීමට අවස්ථාව සලසා දී තිබේ.
උපත ලබා ඇති සිංහ පැටවුන් 06 දෙනා අතර ගැහැනු පැටවුන් පස් දෙනෙකු හා එක් පිරිමි පැටවකු සිටී. මේ වන විට පැටවුන්ට මාස තුනක් පමණ වන අතර, ඔවුන් ඉතාමත් නීරෝගිව පසුවන බවත් ඔවුන් මවගේ කිරිවලට අමතරව මාංශ වර්ග ද ආහාරයට ගනිමින් සිටින බවත් සෆාරි උද්‍යානයේ පශු වෛද්‍යවරු පැවසූහ.
මේ වන විටත් සිංහ පැටවුන්ට අවශ්‍ය එන්නත්කරණද නිසි පරිදි ලබා දී ඇති අතර, ඔවුන් පෙබරවාරි 04 වැනිදා ජනතා ප්‍රදර්ශනයට එක් කිරීමට නියමිතය.
මහජන ප්‍රදර්ශනයට ඉදිරිපත් කිරීමට පෙර මේ සිංහ පැටවුන්ට නම් තැබීමේ විරල අවස්ථාව මෙවර ජනතාවට ලබාදීමට සෆාරි උද්‍යානය සැලසුම් කර ඇති අතර, ඒ අනුව රිදියගම සෆාරි උද්‍යානයේ නිල ෆේස්බුක් පිටුව හරහා හෝ මැසෙන්ජර් පණිවිඩයක් මඟින් මේ සිංහ පැටවුන්ට නම් යෝජනා කළ හැකි බව මාධ්‍ය හමුවක් පවත්වමින් සහකාර අධ්‍යක්ෂ හේමන්ත සමරසේකර මහතා පෙරේදා (21) පැවසීය.
